Ta contempla pa re-introduci Toque de Queda y orario di ciere mas tempran

ORANJESTAD – Aunke enberdad casonan positivo di COVID19 pa dia na Aruba a cuminsa aumenta atrobe, no ta necesario ainda pa aumenta medida mesora. Pero si e cantidad keda entre 20 cu 30 caso pa dia, e ora e ta bira preocupante. Asina prome minister Evelyn Wever Croes a bisa den un entrevista den e programa Noticiacla LIVE diahuebs. Relaciona cu e ‘menaza’ ey, el a confirma e ‘campaña’ cu a cuminsa indicando cu por bin medida extra si cos sigui asina. Y cu medidanan extra e mandatario ta pensa den direccion di re-introduci Toke de Queda anochi, y hala e ora di ciere tambe pa mas tempran, pues mas prome cu 11’or. 

MEDIDA ADICIONAL

Ademas, e mandatario ta bisa cu ta contempla e ora pa kita e flexibilisacion di cantidad di hende na un mesa den un establecimento. Aworaki el a bay na 14 hende na mesa paden, pero porta tin cu bay bek na 4 hende na mesa. Tambe enbez di banda completo of grupo di gaita, reduci esaki atrobe na un cantidad minimo pafo. Tambe reduci e cantidad di artista riba stage paden di 5 bek pa 3. “Bo tin diferente medida cu por wordo tuma, y esaki ta depende unda e origen di e contaminacion ta”, sra Wever Croes cu ta presidi e crisis team, a bisa. E ta splica esaki pasobra e ta sigur cu ora cu e bay Crisis Team, y puntra kico ta bay haci, y si nan constata cu tin clusters, anto e ora e mandatario no por hustifica cu ta cera restaurant mas tempran siendo cu ta na pia di trabou of na cas tin hende cu pa descuido (sinta mucho cerca di otro, ta hari mucho hopi sin tapaboca) y ta pega otro. E ta un decision dificil pa aumenta e medida atrobe y ta depende di hopi factor segun e mandatario. 

CRISIS TEAM

Mes momento cu Prome Minister ta informa e portal di e pensamento, Crisis Team a informa ayera (diaranson) caba riba e posibilidadnan menciona pero no asina specifico. A repasa e situacion actual (te cu ayera) cu e siman aki casonan a subi di 7 caso riba dialuna pa 26 caso positivo diamars y diaranzon a registra un total di 30 caso positivo nobo na Aruba. Total di casonan activo awor a bira 139. Crisis Team ta confirma pues cu si pa algun dia mas e casonan sigui aumenta Crisis Team lo tin pa tuma pasonan necesario pa reduci e plamamento di e virus y proteha comunidad. Lamentablemente ainda tin hopi hende ta pone nan mes na riesgo pa haya e virus y despues ta sigui plama esaki. Tanten cu no tin vacuna ta medidanan drastico so por yuda reduci e riesgonan cu e virus por sigui plama. Ta urgi tur hende pa sigui aplica cu disciplina e reglanan di higiena y distanciamento pa prevencion. No tin otro manera di combati e virus te ora cu vacuna bira disponibel. Tambe ta importante pa asina cu un persona sinti sintoma pa e isola su mes y yama su docter di cas pa por haci un test, esey ta un di otro manera cu ta evita cu e virus ta sigui plama.