Diahuebs a lanta atrobe cu rij largo pa cumpra kerstboom

ORANJESTAD – Diahuebs a lanta cu hendenan para den rij largo atrobe pa ‘busca’ nan kerstboom den Vondellaan. Problema ta cu e lugar no tabata habri ainda y no tabatin ora pa habri, debi cu no a haya permiso di Departamento di Salud y Crisis Team. Na e sitio, e portal aki a compronde di algun hende cu nan tabata para den rij for di 7’or awe mainta, pa busca nan kerstboom cu tabata paga caba. Algun tabata para pa 3 ora den rij ayera, y mester a bolbe awe mainta tempran. Un señora awe mainta a bira malo y mester a bandona e sitio tambe. Mientras cu tur hende tabatin nan tapaboca bisti, nan no tabata cumpli si cu e distanciamento di 1 meter y mei, y esaki por bira un problema. A compronde di e esnan di e lugar, cu ta pensando e miho manera con pa atende cu e publico y a menciona baricada extra. No ta conoci ki ora e lugar aki lo habri.