Polis a cera lugar di bende kerstboom den Vondellaan debi na aglomeracion di hende

ORANJESTAD – Autoridad policial mester a cera e lugar cu ta bende kerstboom den Vondellaan, Kerstboom Landia debi cu e situacion di benta a hera bay for di control diaranzon atardi. Un cantidad grandi di persona a aglomera riba otro pa por a yega na e lugar pa cumpra nan kerstboom. Debi na e situacion, polis a aparece hunto cu DVG y otro instancia y a bisa e doño pa miho cera e lugar y habri bek su manese cu un miho control di publico. 

REY LARGO

Tabatin un rey largo di hende cu via un potret di Facebook tabata circula, unda cu por a mira hendenan den fila largo, para casi riba otro, pa drenta mientras cu autonan a keda pega den fila largo den Vondellaan. Dado momento polis mester a cera e caminda pa asina trece alivio pa e area ey y kita e aglomeracion. 

TARDANSA

Loke a pasa aparentemente, ta cu debi cu e prome lote di kerstboom a caba, hendenan cu no a haya, a paga y reserva di nan. Ora cu e container nobo a yega y habri, hendenan a tende y a bin na gran cantidad pa sigura nan mes di nan kerstboom. Pero e situacion no a duna y hopi a keda pega y lo tin cu bin bek mayan pa haya nan kerstboom.

PROME MINISTER

Prome minister Evelyn Wever Croes den e programa di Noticiacla LIVE diaranzon anochi a toca e tema aki y a bisa cu ta lamenta cu cos mester a bay asina y ta netamente loke nan kier a evita pa ora cu tin bendemento di clapchi despues, esta aglomeracion di hende. Y no a spera nunca cu esaki lo a sosode pa benta di kerstboom. Potret cortesia FACEBOOK, propietario desconoci.