Raad van State: No ta comenta awor riba posicion constitucional gobernador

DEN HAAG – Raad van State no ta duna su comentario aworaki riba e.o. e asunto di posicion constitucional di gobernador. Asina e vice presidente di Raad van State, Piet Hein Donner ta contesta presidente di parlamento di Aruba, Marisol Lopez Tromp den un carta fecha 3 di december 2014. Di otro banda, Raad van State ta mustra nan precupacion pa cu e situacionnan pendiente y cu partidonan no ta logrando pa formula contesta riba e preguntanan aki. Manera ta conoci, tanto gobierno di Aruba como parlamento (fraccion di AVP) tabata kier pa e organo aki duna su 'vision' riba e asunto, pero gobierno di Hulanda no kier a cumpli cu e peticion aki. Ni ora cu parlamentarionan hulandes a haci e peticion. Presidente di Parlamento di Aruba awor a haci e peticion, y aki tambe esaki no a keda contesta, pero e biaha aki directamente pa e organo consultativo mes. 

Fuera di e asunto di gobernador, finanzas publico di Aruba y e asunto di integridad na St Maarten tambe a keda menciona na Raad van State pa un conseho, pero ningun di nan lo wordo duna. Mes momento Raad van State ta mustra cu nan ta sigui e asuntonan hopi di serca si, mirando e hecho cu nan ta un organo cu ta uno di Reino y como tal ta inclui Aruba tambe. “Pero aworaki no ta na Raad van State pa duna su vision riba e problematica menciona den Reino (Hulandes).

Donner ta mustra tambe cu no obstante nan lo no duna nan vision, cu substantivamente ta trata di cuestionan serio cu, ta wordo trata a base di hopi desacuerdo entre partidonan. Y ta parse cu no ta algo cu paisnan riba nan mes por y lo soluciona. “Tin mas manera cu por beneficia cu un enfoke mas uni den relacion di Reino. Y Statuut ta brinda e posibilidad ey”, e carta ta sigui bisa.( Mira e carta original aki).