CT: Si casonan di COVID19 sigui aumenta, mester re-introduci medida

ORANJESTAD – E cantidad positivo di COVID19 pa un dia pa Aruba diaranzon a yega 28 local (kitando dos no residente pa total di 30), cu ta e cantidad mas halto desde mitar di November ora cu e cifra tabata den cifra singular (single digit) pa un bon rato. E situacion tabata suficiente pa awe Crisis Team (CT) manda un alerta indicando cu si cifranan sigui aumenta asina, lo tin cu re-introduci medida. No a haci mencion si di ki medida esaki mester ta. Tambe e cantidad di casonan a subi te casi 140 (139), despues cu el a yega te 77 cu tabata e cantidad mas abou desde e di dos ola a cuminsa na augustus. 

PATRONCHI

Si tuma mitar di November mas of menos, tabatin cifranan singular local (7, 8, y 5 pa dia), cu a sigui te dia 23 di November. Tabatin un excepcion dia 21 di November cu tabatin 21 caso (local), y despues dia 24 di November esaki a drenta ‘double digits’, esta di dos cifra, for di average 12 pa 25. Cu excepcion di un dia (29 di November) cu a registra apenas 2 caso (local) den weekend, esaki a subi asina siman a habri te 25 y awe 28 (30 total) 

SITUACION ACTUAL

Segun resumen di awe fuera di e cantidad di caso positivo, 13 persona a recupera, cantidad di testnan ehecuta ayera ta 355 'positivity rate' local riba dia di awe ta 7%. 

ACTIVO

Activo tin awe ta 139 caso, cantidad di fayecido relaciona cu Covid-19 ta na 45.

HOSPITAL

Hospital ta informa cu tin un total di 9 persona interna di cual 0 ta den Cuido Intensivo y 9 isola riba piso general.