TjinAsjoe: Dificil pa determina si conseho negativo di CDC ta afecta turismo pa Aruba

ORANJESTAD – Ta dificil pa determina si e conseho di biahe negativo pa Aruba manera emiti pa Center for Disease Control (CDC) Mericano ta afecta nos turismo. Asina CEO di Aruba Tourism Authority Ronella Tjin Asjoe a bisa noticiacla. Manera ta conoci, CDC a baha Aruba (y un cantidad di otro pais) pa categoria 4 recientemente, cu un conseho negativo di biahe debi na e situacion di COVID19. Mes momento sra Tjin Asjoe ta bisa si cu den November, Aruba a conta cu mas buelo for di e mercado aki, cu normal. “Nos ta finalizando procesamento di nos resultadonan pa November y e ta mustra di ta mas di locual nos a proyecta” e CEO a bisa. 

DESTINACION TOP

Un punto importante segun Tjin Asjoe, ta cu segun diferente investigacion, Aruba ta keda un di e destinacionnan top pa esnan cu ta biaha for di Merca. Pero enberdad tin e dos retonan cu ya e portal a menciona, esta cu Centers for Disease Control and prevention a pone Aruba y tur otro pais cu tabata den grado di risico 3 (cual casi tur pais ta) den categoria 4.  Esaki a base di un cambio den nan manera di categoriza paisnan. “Esaki tambe ta un aspecto cu ta sigui tin nos atencion. Mas mihor nos ta den maneho di reduccion di nos cantidad di casonan positivo, mas chens nos tin di baha e nivel di risico cu CDC ta pone pa Aruba. Pues nos mester keda cu e meta aki presente nos ta sigui ta den contacto cu e.o. Consulado Mericano pa cu e topico aki” sra Tjin-Asjoe a sigui bisa.

CON PA DETERMINA E EFECTO DI CDC

Mientras cu segun e CEO ta ta dificil pa determina e efecto di e limitacion (categoria 4), e ta bisa cu lo mester determina cuanto persona simplemente no ta biaha pa via di esaki. “Nos ta sperando mas demanda for di Merca, pero manera indica ta keda tene e retonan na cuenta. Ora cu e CEO bisa cu ta spera mas bishitante cu a spera mester tene cuenta cu algo si: “ E 'mas di loke nos a spera' ta keda bou di nos scenario conservativo si ainda .. esta pa luna di November” e CEO a finaliza bisando.