Seis sindicato a pidi gobierno clarificacion riba paramento di cortamento di salario na WEB

ORANJESTAD – Sindicatonan SADA, SEPPA, SIMAR. SADA, FTA y TOPA a exigi claridad di gobierno diamars atardi, despues di a tuma nota di un carta di WEB cu ta stop ‘cortamento di salario’ pasobra ‘otro companianan estatal di gobierno no tabata contribui. Basando nan mes riba un combersacion cu prome minister siman pasa, nan ta considera cu e mandatario no tabata sincero cu nan ora cu a bisa cu tur mester contribui sino ta haya nos mes den problema cu Hulanda. Esaki pasobra Hulanda a pone condicion pa corta den salario, sino lo no a haya subsidio. Segun e vocero di e grupo diamars, Edward Maduro, gobierno tabata sa bon bon cu tin companianan cu no ta contribuyendo, pero no a comparti e informacion aki. A manda un carta pa gobierno exigiendo clarificacion den un periodo cortico, sino por a spera problema. 

CLARIFICACION

Mientrastanto gobierno a clarifica e mal comprondemento cu a surgi cu WEB, y awor ta keda na sindicatonan pa compronde esaki. Esta cu WEB a basa nan mes riba un confusion y mal comprondemento y a base di esey, a stop cu nan contribucion. Algo cu awor parce di ta resolve. E problema sinembargo ta cu sindicatonan no a gusta mucho cu gobierno a opta pa bay prensa y clarifica esaki envez di contesta nan prome.