Segun minister, a clarifica confusion cu a surgi na WEB pa cu cortamento di salario

ORANJESTAD – Minister di finanza Xiomara Maduro diamars a bisa cu a clarifica e confusion cu a surgi na WEB pa cu cortamento di salario. Esaki despues cu e portal aki a publica e carta di WEB cu ta bisa cu lo para e cortamento di 12.6% di salario manera concorda, pasobra otro companianan di gobierno a stop di corta esaki. Y esaki segun e mandatario, no tabata berdad. Manera ta conoci, como condicion di Hulanda, a pidi tur compania estatal (20 total) pa corta den nan salario pa cumpli cu e peticion aki. Loke no tabata conoci, ta cu 7 di e 20 companianan (entre nan WEB) tabata deposita e cortamento aki den un fondo special pa FASE. E otro 13 companianan no por a haci esaki debi na nan situacion financiero. 

LISTA

Loke a bruha e cuenta ta cu tin un lista cu tabata core cu ta mustra como si fuera ta solamente e 7 companianan tabata cortando y e otronan no. Pero e lista tabata pa esnan cu tabata deposita na e fondo. Despues cu minister di finanza Xiomara Maduro a reuni cu gerencia di WEB y tambe e sindicato SIWA, ta mustra cu e situacion ta ‘normaliza’. E mandatario no por a confirma cu si esaki ta nifica automaticamente cu e compania lo continua cu e cortamento. “E condicion ta duidelijk” E mandatario a bisa solamente, indicando cu nan mester sigui corta. Pero no por a confirma cu si realmente esaki a sosode, pasobra e mandatario no por a papia na nomber di e compania.  

SINDICATONAN

Mientrastanto un grupo di sindicato di trahadornan publico a tene un conferencia di prensa pa reclama e situacion y cu nan kier claridad di gobierno riba e tema. A duna gobierno un tempo pa e claridad aki, sino por a spera problema.