MEP cu ley pa pago di fiansa di estudio bira 'aftrekbaar'

SANTA CRUZ --  Fraccion di MEP ta trahando riba un proyecto di ley pa duna alivio na esnan cu ta paga nan fiansa di estudio bek. Esaki den forma di un 'aftrekpost' di inkomstenbelasting, pa duna nan un alivio pa e temporada cu nan ta paga nan fiansa di estudio bek. E proposicion di MEP ta ensera cu tur esnan cu ta pagando un fiansa di estudio bek, por deduci locual nan ta pagando, te na un maximo di 10 mil florin, pa un periodo di 10 aña. Por deduci no solamente e interes, manera ta e caso awor aki parcialmente, sino e interes y e 'aflossing' total, mescos cu Corsou a introduci na fin di aña pasa. E deduccion lo bira un 'persoonlijke last', pues ta completamente deducible, te na maximo di 10 mil florin. Segun e partido, e areglo aki lo conta pa TUR fiansa di estudio. Contal cu ta trata un fiansa di estudio, no ta importa unda bo a studia. Loke si ta un punto, ta cu e ta conta solamente cu forza retroactivo pa esnan cu a caba studia tambe for di 1 januari 2014.