Persona di Aña 2020 di Noticiacla: Prome minister Evelyn Wever Croes

Pa di dos aña sigui, nos portal www.Noticiacla.com ta saca su ‘Persona di Aña’. Contrario na otro medionan, e portal aki no ta saca ‘woman’ of ‘man’ of the year, sino persona di aña. E prome persona cu a haya e premio aki di Persona di Aña  tabata Janine Rodriguez, di Slachtoffer Hulp na 2019.  E aña aki, e escogencia no tabata nada dificil. Manera e dicho popular ta bisa, ‘hasta e ciego Jose Feliciano por a mira esaki ta bin’. Noticiacla.com a dicidi cu e aña aki, e honor ta bay pa nos prome minister sra Evelyn Wever Croes. No tin ningun duda cerca nos, cu nos prome minister merece e premio aki. No pasobra e ta un politico, ni pasobra e ta un ser femenino. No. Pasobra mientras cu berdad e ta tur e dos cosnan ey tambe, ta pa loke el a haci y (no haci) cu e ta haya e premio e aña aki. Aña 2020 ta bay den historia como e aña di mas ‘reto’, pa no bisa otro cos. Pa cuminsa, e forma for di inicio  e mandatario a tuma mando di e maneho di e virus conoci como COVID19 na practicamente comienzo di e aña aki, tabata remarcable. Un malesa cu niun hende a pidi pe ni tabata sa con pa maneha, sra Wever a para firme y tuma decisionnan dificil, duro pero concreto, cu determinacion, cu a pone cu e la sa di logra un control impresionante durante e prome ola cu merece tur clase di respet. Tuma e decisionnan cu el a tuma, no tabata nada facil y por tabatin consecuencia politico serio pe y su gobierno. Asina mes el a dicidi di e.o. cera frontera pa prome biaha den historia, impone un toque de queda (tambe historico), y presidi un crisis team cu no tabata algo facil. Hopi critica, hopi profeta na banda, pero asina mes el a sigui y logra. Despues, como si fuera poco, envez di tuma e caminda facil y habri man tuma placa di Hulanda pa scapa nos, el a tuma otro decision cu a conduci den un impasse cu Hulanda di 5 luna. Y mustrando aun mas astucia y mandando un señal pa Hulanda cu e no ta tuma kico cu ta, mientrastanto a opta pa cera un fianza (bridge loan), sigurando cu pa algun luna mas (mientras e debacle cu Hulanda tabata sigui) Aruba lo por a sigui dilanti, sin Hulanda. Esaki contra hopi conseho encontra. Mientras cu hopi a critica e paso aki, y yame un capricho politico pa ‘salba’ autonomia, finalmente el a acepta e deal cu Hulanda, y ainda cu hopi den su seno di partido contra dje, a firma pa Aruba haya e placa necesario. Ora cu pa descuido y iresponsabilidad di un grupo di persona, Aruba a haye confronta cu un di dos ola fuertisimo, el a maneha esaki sin necesidad di bay den un lockdown manera e prome biaha, y awor nos ta na un nivel cu e ta mustra di ta controla. Aki aya, e por a haci algun cos diferente, pero atrobe, no tin experto riba e tereno aki.  Como si fuera poco, el a haye mei mei di un crisis den un crisis, (e biaha aki uno politico) ora cu e partido miembro di coalicion finalmente a dicidi cu ta basta y cu sosten di mayoria den Parlamento a perde confianza den un di su ministernan. Aki tambe e mester a tuma algun decision, cu resultado cu e la termina cu un cartera extra, cu a dune solamente mas trabou. E portal aki mes tabatin algun critica riba parti di su maneho riba e tema aki, pero semper a dune beneficio di duda. Tambe tabatin e parti di p.e. e biahe cu el a haci durante pleno crisis, mientras cu e tabata su derecho. Nos a sinti cu e no a maneha esaki di e miho forma. Y asina tin otro cosnan cu nos ta haya cu e lo por a maneha miho. Un di nan, ta pa tene un miho control riba su gabinete y cierto ministernan, y evita di laga cierto cosnan yega asina leu. For di un di e hopi encuestanan cu e portal aki a bin ta haci, a confirma cu e usuarionan di e portal aki no ta mucho contento cu e gabinete su trabou, y pio ainda e Parlamento. Pero e mesun encuesta aki a mustra tambe cu e prome mandatario tabata practicamente e unico cu a resalta como positivo di e encuesta aki.  Nos sa cu para na banda y critica ta facil. Tanten cu bo no ta para den su sapato, tur cos ta facil. Sra Wever a sa di tene su postura durante tur loke a sosode y ta sosodiendo den 2020, y a demostra di un lider capaz, semper cu un sonrisa, y mas aun, e trankilidad cu cual e tabata dirigi tur crisis cu a presenta ( y cu lo sigui presenta). Si el a haci un bon trabou, ta pa pueblo dicidi otro aña durante eleccion 2021. Pero pa e portal aki, pa e aña aki sin ningun duda, sra Evelyn Wever Croes ta ‘E Persona di Aña 2020’. Pabien!.