Kiwanis Club of Palm Beach cu actividad di Ride4Kids Challenge

ORANJESTAD – Diadomingo dia 29 di November 2020 a tuma lugar e prome edicion di e Kiwanis Ride4Kids Challenge. E actividad aki tabata un iniciativa di Kiwanis Club of Palm Beach Aruba pa recauda fondo pa duna aporte na nos comunidad, especialmente na muchanan den necesidad.

Aña 2020 a wordo grandemente afecta pa e Pandemia di Covid-19. Mayoria organizacionnan voluntario na Aruba, incluyendo Kiwanis Palm Beach, mester a reinventa nan mes pa asina por sigui funciona y cumpli cu nan metanan proponi. E presidente actual, Richard Roy, no a hesita ningun momento y a instala un “Innovation Committee” bow di liderazgo di Distinguished President Michel Janssen y pone un reto nan dilanti: bin cu ideanan nobo pa recauda fondo pa asina e club por conta cu e medionan necesario pa sigui contribui na e comunidad pa medio di su proyectonan social, cu den gran parti ta enfoca ariba e bienestar di nos muchanan. 

Kiwanis Ride4Kids Challenge tabata encera un actividad di ciclismo unda dos miembro propio di e Club a acepta e hazaña pa pasa rond henter Aruba cu bicicleta, asina recaudando fondo pa cada Kilometer completa of cu donacion fiho. E miembro nan deportista ta alavez dos figura conoci den nos comunidad, esta Rothmar Coenraad y Theodore (Ted) Johnson. Finalmente, un di tres deportista miembro, Michel Janssen, a acepta e reto pa acompaña pa dos-tercera parti di e ruta.

E evento a cuminsa pa 5:00’or Diadomingo mainta cu Rothmar saliendo for di cercania di e Faro na Westpunt y Ted Johnson biniendo acerca na Neptali Henriquez Park. E ruta a sigui te cu e Faro na Seroe Colorado y for di anker na Grapefield San Nicolas Michel Janssen a acompaña nan. E trayectoria rond Aruba total lo a cubri un distancia di alrededor 80 kilometer. E prome horanan di e recorido a bay relativamente facil. Despues e cansancio a cuminsa afecta e deportistanan severamente. Tambe, tempo no a coopera cu yobida y biento fuerte rond Aruba. No obstante, e pensamento di e meta noble aki, pa recauda fondo pa nos muchanan, a haci cu nan a sigi e ruta. Esaki a hiba nan pa Gold Mine Bushiribana y despues pa Westpunt y Malmok, y bek pa Neptali Henriquez Park, Oranjestad. Al final Rothmar Coenraad a cubri e distancia di 101.4 km den un tempo record di solamente 4 ora y 39 minuut, Ted Johnson a cubri 82.1 km, cu ta e vuelta rond Aruba, den 4 ora y 52 minuut y Michel Janssen a cubri un distancia di 48.9 km den 3 ora y 40 minuut .

Riba e mesun dia Kiwanis Palm Beach a inicia un otro proyecto pa recauda fondo. E actividad aki a encera e desmantelacion di un cantidad di pallet, cu e idea pa uza e palo nan aki pa traha baki di mata, cu nan nan turno lo wordo bendi pa recauda fondo. Den Cuadro di protocolnan di prevencion di Covid-19 e actividad tuma lugar pafo, den aire liber, observando distanciamento social y haciendo uso di tapaboca. Na e actividad aki un grupo grandi di e miembrecia a asisti. Asina un grupo grandi di voluntarionan, cu nan hermentnan, a logra desmantela alrededor di 60 pallet den un solo mainta. Nos ta pidi pueblo di Aruba pa keda pendiente pa mas informacion di e proyecto aki.

Manera anteriormente menciona, e fondonan recauda lo wordo dedica na donacion of proyecto nan social den nos comunidad cu enfoque riba muchanan den necesidad. Kiwanis Club of Palm Beach Aruba kier a tuma e oportunidad aki pa gradici tur esnan cu den un forma of otro a contribui na e Kiwanis Ride4Kids Challenge. Un gradicimento special ta bay na tur esnan cu a sponsor Ride4Kids Challenge cu un suma di placa. Alavez ta informa cu ainda ta posibel pa contribui cu bo donacion door di manda un email pa ride4kids@kiwanispalmbeach.com mencionando bo nomber y faam.