Comision a finalisa raport pa aumenta entrada na camber di hotel

ORANJESTAD – Gobierno kier aumenta e entrada na camber di hotel, conoci como RevPar (Revenue per available room). Pa logra esaki, un comision di experto den turismo den curso di casi un aña di tempo a formula un plan pa genera e.o. 9% di aumento di e RevPar, den e proximo 3 pa 4 aña. E plan aki a wordo presenta awe na prensa, cu ta splica e recomendación cu e comision a haci.

E comite a reparti e tareanan y responsabilidadnan pa cual a compromete cu otro den 3 fase. 1. Metanan cu kier logra den e proximo 6 lunanan; 2. Metanan cu por logra dentro di 1 ½ aña y ; 3. Metanan cu por wordo implementa dentro di 3 aña. E partnernan ta compromete nan mes pa traha riba esaki y na final di dia ta di por tin un producto di un calidad hopi mas halto, tanto pa loke ta trata producto, pero tambe den servicio. Esaki mester conduci na logra e meta di crecemento promedio di 9% den RevPar, consecuencia automatico di dje ta cu e placa cu e turista ta gasta den economia di Pais Aruba lo ta na e nivelnan cu gobierno a pone pa loke ta trata e proximo añanan nos dilanti.