Partido MEP a lansa campaña electoral oficialmente pa eleccion 2021

ORANJESTAD – Partido MEP oficialmente a inicia nan campaña electoral pa eleccion di Parlamento 2021, awe dialuna mainta. Na e cede di e partido geel, lider di partido Evelyn Wever Croes a haci e anuncio aki. Hunto cu esaki a revela e logo nobo di e partido. A sigura cu e campaña lo ta uno totalmente diferente cu locual nan hendenan ta custumbra di dje. 

KICO POR SPERA

E motibo principal pa e cambio ta e efectonan di COVID19. Por lo menos pa comienzo di e campaña, y lo wak na caminda con cos ta desaroya y con esaki ta afecta e campaña. Loke por spera pa awor, ta actividadnan manera drive-by of drive-thru, na forma responsabel. Tin pensa di haci mas uso di medionan digital y lo no tin material di custumber mirando e crisis cu tin. Gran parti ta debi cu no kier gasta e placa debi na e crisis economico. “Nos no ta kere cu ta prudente pa na e momentonan aki nos tin e materialnan cu nos tin custumbra di tin”, e mandatario a bisa. E no a specifica si, si e ta referi na p.e. bandera, sticker y otro material di custumber. A cuminsa busca candidatonan caba pa reemplaza esnan cu no tey mas. E unico cu a menciona nomber cu no tey mas sigur, ta esun cu a bira independiente, esta Daphne Lejuez, pero ta sali di e punto di bista cu tur e candidatonan cu ta parlamentario awor, lo sigui un buelta mas por lo menos. No por a confirma si ta sigur cu nan lo sigui. Si tin cambio, lo cuminsa anuncia nan den curso di otro aña. A sigura si cu un comision ta trahando riba esaki pa recluta miembronan nobo pa bay riba lista. A desea pa e campaña ta uno di nivel, pa asina e votador tin su forma di haci su escogencia ora cu ta asina leu. 

LOGOE logo ta practicamente mescos, cu excepcion cu e phoenix (e parha geel) ta awor den un forma tres dimensional, y saliendo for di e solo. Esaki segun e lider di partido, ta simboliza cu e ta saca nos for di e problemanan cu tin, pues esey ta e salida for di e solo, envez di ta den e solo, manera cu e logo anterior tabata. A demonstra esaki den un video, durante e conferencia di prensa.