Encuesta: Mayoria ta resisti contra vacuna pa COVID19

ORANJESTAD – Segun e encuesta mas recien di noticiacla.com, mayoria cu a participa no kier vacuna nan mes contra COVID19. E grupo mas grandi aki ta di personanan entre 18 pa 44 aña di edad, esta esnan di edad mas hoben. Y e districto cu mas ta rechaza e vacuna segun e encuesta, ta San Nicolas. Un total di 1042 persona a participa durante 4 dia na e encuesta no cientifico aki di noticiacla.com. 

DIVISION 

Mester bisa mesora si cu, entre esnan encuesta unda cu tin un grupo cu berdad a vota mas cu e otro, e diferencia entre e SI y NO ta chikito. De hecho, tin casi un division di 50-50% entre esnan kier un vacuna y esnan cu no kier. Esnan cu a participa den e encuesta, e mayoria (51%) a bisa NO na e vacuna, mientras cu 49 % (diferencia di 18 voto) a bisa SI. Entre esnan cu a vota NO, e mayoria den e categoria aki (65%) ta bisa cu nan ta contra debi na e efectonan secundario.

EDAD Y DISTRICTO

Interesante tambe ta e reparticion di edad y districto unda cu esnan cu a participa, a vota. Aki a resulta cu e grupo mas grandi cu a nenga e vacuna ta esnan den edad 18-24 aña, 25-34 y 35-44 aña, cu ta 78%, 65% y 55% respectivamente. Pues, e grupo hoben ta resisti, sea pasobra nan ta kere cu nan no ta considera nan mes den e grupo di risico of problematico. E grupo cu si ta pro, ta e grupo di edad mas avansa. E edad di 65 y mas halto, 55-64 y 45-54 SI tabata kier e vacuna cu 63, 57 y 52% respectivamente. Nan ta sinti nan mes mas vulnerable obviamente y no tin problema pa tuma e vacuna. Pa loke ta districto, San Nicolas ta e districto cu mas a resisti contra un vacuna pa COVID19 cu 63%, mientras cu esun cu mas tabata pro e vacuna, tabata den Noord cu 54%. Consecuentemente tambe San Nicolas tabatin e porcentahe mas abou di SI, cu ta 37%, y Noord esun cu mas menos porcentahe pa NO cu ta 46%.  Esnan cu a vota pa e siguiente opcion (13%) tabata esun ‘contra tur vacuna’, y e otro opcion tin ‘otro motibo’ cu no ta specifica. Y tin un grupo mas chikito di 2 % cu a scoge e opcion ‘no ta sinti cu nan mester di un vacuna’.   

RESISTENCIA

E resultado no ta completamente sorprendente, ya cu e portal aki a a combersa cu varios experto medico (docter di cas), personal di DVG y gobierno, cu a bisa cu e posibilidad ta existi cu un grupo grandi di persona lo por resisti, pa varios motibo. Falta di informacion riba e vacuna ta un di nan. Ademas, ora cu e portal aki a publica e noticia di e encuesta riba e tema, hopi a comenta nan pensamento riba Facebook riba e vacuna. Entre nan, hopi tabata no solamente contra e vacuna, sino tambe a cuestiona cua tipo di vacuna Aruba lo bay haya y cu ta depende di e ‘marca’ di e vacuna si nan ta tuma e vacuna. Algun tabata papia di conspiracion nan cu un vacuna ta un bon metodo pa tin control riba bo poblacion door cu lo por inyecta cosnan den curpa di e persona. Tur ta teoria nan cu expertonan medico ta considera hopi radical y no corecto sinembargo. 

CONCIENTISACION

Manera menciona caba, cu e.o. e resultado di e encuesta aki pues, ta comprendible cu gobierno lo tin trabou pa haci, esta den e forma di concientizacion pa convence e comunidad di e beneficio di un vacuna. Sigur si mira cu mitar ta pro y e otro mitar ta contra. E siman aki ainda gobierno a raporta cu e vacuna no ta obligatorio y cu cierto gruponan lo tin prioridad pa haya esaki. Y tambe cu lo no tin costo monta na esaki. Problema ta cu si casi mitar di e comunidad (atrobe si mester uza e resultado di e encuesta no cientifico aki como un ehempel) no kier e vacuna, e ora e meta di e vacuna ta bay perdi. Y cu esaki, medidanan lo mester keda pa asina proteha e comunidad. Expertonan medico a splica e portal aki cu nan ta kere cu, cu tempo hende lo cuminsa acepta e idea di vacuna contra COVID19, y cu hopi lo ta pendiente di con rond mundo e vacuna ta actuando y asina nan haya un siguranza personal pa cu e necesidad di e vacuna. Gobierno a bisa e portal aki caba cu si for di un comienzo, hasta den e grupo vulnerable, ripara un resistencia, por cuminsa traha riba un forma ‘obligatorio’ indirecto.