Hospital Horacio Oduber tin director general nobo aki tres luna

ORANJESTAD – Aki tres luna hospital Horacio Oduber lo tin su director general nobo. Asina fuentenan yega na e proceso a confirma na NoticiaCla.com. “Aki dos siman lo saca e avisonan pa solicitud habri pa cuminsa cu e proceso” e fuentenan a sigui bisa. A mustra cu e enfasis ta pa busca un persona cu no necesariamente mester ta un medico, sino un bon gerente, cu habilidad pa por comunica cu hende, personal, y resolve asuntonan clave. E intencion ta pa busca un persona sea local of internacional. Mientrastanto e director interino Ezzard Cillie ta keda cu su funcion, tambe ora cu e director general wordo selecta y apunta. E director nobo lo haye mesora tambe den loke ta e trabounan di ‘reconstruccion y construccion anexo’ di e hospital, cu ya caba ta andando.

Hunto cu e seleccion di un director nobo, ta bin tambe e informacion si tin hendenan cu tin bista ariba, pero riba esaki no por a haya un confirmacion. Entre nan a figura aña pasa algun nomber di cual esun mas prominente cu tabata resona, tabata actual minister di husticia Arthur Dowers. “E ta liber pa solicita” e fuente a bisa. Den pasado fuentenan den e mesun direccion a sigura NoticiaCla.com cu nan ta considera Dowers ‘mas cu cualifica’ pa e funcion, pero cu e persona mester solicita.

Pa loke ta e mandatario mes, ora cu e la wordo acerca aña pasa pa NoticiaCla.com riba e tema, e la sigura cu ‘no a hacimi ningun oferta ainda’. Mes momento a bisa cu e biaha aki e lo considera e posicion y si e ta un oferta cu ta atractivo, e lo evalua esaki sigur. E biaha aki, contrario na e prome biaha cu su nomber a cay, e ta disponibel pa sondea e posibilidad. Den pasado a aserc'e y e la nenga e funcion mesora ya cu e la caba asumi e tarea di minister, y a informa cu e kier a termina esaki prome. Awor cos ta diferente y e no a descarta cu e lo evalua un eventual funcion asina den futuro. E mandatario actualmente ta na Hulanda y ta bolbe mitar di e siman aki, y lo wak kico e situacion ta pa dicidi si ta aplica of no.