Conocido politico Andre Bosman no ta bolbe Tweede Kamer

DEN HAAG – Despues di 10 aña activo, e conocido politico miembro di Parlamento di Hulanda (Tweede Kamer) Andre Bosman no participa den eleccion pa Tweede Kamer na maart 2021. Asina el a confirma pa Noticiacla.com diabierna mainta. “Si ta berdad” e parlamentario a bisa e portal. Motibo ta cu miembronan di e partido a establece un asina yama ‘profielschets’ cu ta bisa cu un politico por ta miembro di Parlamento (Tweede Kamer) maximo 8 aña. “Y ami ta bayendo pa 11 aña caba”, sr Bosman a bisa. 

FUTURO DI BOSMAN

Conoci como un politico Hulandes hopi vocal y critico, sigur den direccion di politiconan di Aruba y otro islanan di Caribe Hulandes), Bosman a bisa cu e no ta sigur si esaki ta nifica necesariamente su retiro di politica. Ora cu a puntre si esaki ta nifica su retiro di politica, el a contesta “Esey mi no sa ainda. Mi no tin un idea kico ta bay sosode despues di 17 di maart (cu ta e fecha di e proximo eleccion). Mi ta rondeando e posibilidad pa un otro trabou aworaki”. 

MENSAHE PA ARUBAMirando cu semper e ta(bata) un critico fuerte di politiconan di Aruba, a puntre kico ta su mensahe pa nan, na momento di anuncia su retiro. “Stop cu Friends & Family. Haci gobernacion transparente” el a cuminsa na bisa. Mesora el a referi na e caso di minister Dangui Oduber cu a crea trabou di chauffeur pa su personal cu a bay DVG. “No crea trabou extra pa chauffeur cu salario halto y un auto. E ora cos ta bay drecha pa Aruba!” e miembro di Parlamento Hulandes a finaliza bisando.