Ex premier di Corsou Gerrit Schotte a recobra su libertad

WILLEMSTAD – Exactamente dos aña despues cu corte di casacion como ultimo chens di ex prome minister di Corsou   pa purba proba su inocencia a mantene e sentencia original di castigo di tres aña di prizon, y despues di tabata cera 1 aña y 10 luna, Gerrit Schotte a recobra su libertad diabierna mainta. E atencion pa su libertad tabata grandi, tanto di famia y conocirnan como prensa. Na su salida, sr Schotte a bisa cu e periodo den prison a cambie como persona. Riba kico e kier bay haci awor cu e sali, el a comenta cu e prome cosnan cu ta bay haci, ta tin un cita cu su creador (misa), bebe un koffie di cas, y topa su famianan, refiriendo na su dos yiunan. Pa loke e kier come como prome cuminda, el a indica cu basa riba deseo di su yiu muhe Sofia, lo mas probable ta cu awe nochi nan lo come cuminda Indio. 

CASTIGO

Tabata riba 5 di December 2018 cu el a presenta na prizon Bon Futuro pa cuminsa sinta su castigo, pa cual el a keda sentencia inicialmente 11 di maart 2016 pa entre otro corupcion. A apela e sentencia y 21 di juli 2017 corte di apelacion a mantene e sentencia inicial di 3 aña di castigo. Cos no a para aki y a bay te corte di casacion. Y aki tambe dia 27 november 2018 corte di casacion a mantene e sentencia inicial cu a nifica cu e castigo di prison a bira irevocable. Esey a nifica e ora cu Schotte su recursonan a caba y un siman despues mes a raporta na porta di prizon. Na juni ultimo, el a wordo nenga e oportunidad pa sali liber prome cu banchi electronico, y mester a warda te cu su fecha ‘regular’ di VI (voorwaardelijke invrijheidstelling) cu tabata de facto diasabra esta mañan, pero como cu riba diasabra no ta libera detenido, a hacie pa awe. Potret cortesia Telecuracao.