OM: Mortonan den Latin Passion Bar tabata pa intoxicacion pa monoxido di carbon

ORANJESTAD – E mortonan den Latin Passion Bar na juli ultimo tabata pa intoxicacion pa monoxido di carbon. Asina ministerio publico a informa diahuebs den un comunicado.   Ministerio Publico a informa cu nan a tuma un decision den e investigacion di e sucedidonan di 22 di juli 2020 na Latin Passion Bar na San Nicolas, unda dos persona a fayece y dos a resulta herida. Un di e personanan cu a fayece tabata e administrador di e bar. Investigacion a mustra cu e dos personanan a fayece a causa di intoxicacion pa monoxido di carbon (koolmonoxide, CO-vergiftiging).

Ayera e fiscal cu tin e caso a tene asina yama slachtoffergesprekken cu famianan di e victimanan, durante cual nan a wordo poni na haltura di tur e resultadonan di e investigacion. 

E investigacion a mustra cu e monoxido di carbon tabata procedente di e motor di combustion di e generador cu tabata wordo uza pa e administrador di e bar pa tin coriente den e lugar. Door cu e portanan di e bar tabata cera e anochi ey, e gas toxico a yena e lugar. A resulta cu e administrador a wordo adverti na tres diferente ocasion door di personanan , entre nan un instalado y tambe e doño di e bar, contra uso di e generador na e forma aki. 

Di ningun manera a sali for di e investigacion cu e hendenan den e bar a perde nan bida door di un crimen. E unico cu posiblemente lo por a wordo apunta como esun responsable, mes tambe a fayece. Ministerio Publico a termina e caso.