IBISA: Hobennan a bishita e Parke na Lago Heights

SAN NICOLAS - E parke nobo na e subida di Lago Heights ta un tremendo lugar pa practica deporte di canamento y coremento. Esaki a keda constata siman cu a pasa durante di e programa di vacacion na San Nicolas.

E grupo di hoben cu a participa den e programa di vacacion di Sport Centrum IBiSA San Nicolas tabata tin un caminata den forma di speurtocht. E muchanan a cana y pasa den diferente area di e bario di Wegkustbatterij, na postnan unda nan mester a busca of contesta varios pregunta. Y na final di e speurtocht nan a bin conoce un parke sumamente interesante. Un tremendo lugar pa tene curpa den condicion of pa practica canamento y coremento. (Te hasta tabata tin espacio unda e muchanan por a hunga un poco di futbol y trefbal).

Kisas hopi hende no sa ainda con bunita e parke aki ta pero sin duda, e Parke di Lago Heights “ta bal la pena” pa wordo bishita y bon uza’ pa haci bo entrenamento. E ta un lugar cu tin subida leve pero cu ta haci hopi bon na bo condicion. Tambe mester subi trapi na cierto caminda cu tambe ta haci e ruta aki uno hopi interesante. Oranjestad tin un Linear Park masha bunita y e Parke na Lago Heights no ta keda’tras cu un ruta mes bunita y atractivo. Kisas ta un bon idea pa den futuro pone na cierto distancia riba e ruta den e Parke di Lago Heights, postnan unda esnan cu ta haci uzo di e ruta por haci ehercicionan manera pull ups, situps, etc. pues estilo diun ‘hindernisbaan’. E tabata un dia exitoso pa e muchanan cu a participa den e programa vacacional di Sport Centrum IBiSA San Nicolas. Mientras tanto e siman aki e ‘Vakantie Kamp’ di IBiSA ta na Centro Deportivo Libertador Betico Croes na Sta. Cruz y otro siman ta culmina e programa di vacacion cu e siman na Compleho Deportivo Frans Figaroa na Noord. Lamentablemente IBiSA ta informa cu tur cupo disponibel pa participa na e programa di vacacion a yena, pa cual motibo no ta tuma mas inscripcion. IBiSA ta desea na tur hoben un dushi tempora di vacacion escolar 2014.