Oduber: No tin nada malo cu nombracion di personal pa DVG

ORANJESTAD – E informacion cu ta circulando riba nombracion di personal di oficina di minister Dangui Oduber pa Departamento di Salud (DVG) no tin nada malo cu ne y tampoco ta ‘algo nobo’. Asina e minister en cuestion a bisa noticiacla.com. “Esaki no ta un secreto”. For di ayera ta circula copia di un documento di un decision cu conseho di minister a tuma na September di e aña aki, unda cu a nombra un cantidad di persona di su oficina pa DVG cu contract pa 5 aña. Entre e comentarionan cu ta circula, ta bisa cu esaki ta algo imposibel. Imposibel den e sentido cu ta considera esaki como algo insolito, y no digno di un gobierno cu ta propaga integridad. Sigur si ta papia cu mester combati e fenomeno di ‘friends and family’ Pero e mandatario ta sigura cu nada malo no a sosode aki. 

E “DEAL” CONTROVERSIAL

E decision di conseho di minister cu un grupo di persona ta cuestiona, ta esun di dia 1 di September ultimo, unda cu conseho di minister a aproba contracto pa chauffeur nan di transporte pa pashent, y tambe un hefe di e departamento di cuido di anciano (ouderenzorg). Ta trata di un total di 5 persona cu a keda nombra cu contract di 5 aña, tur trahando directamente den oficina di e mandatario, y cu a pasa pa DVG completo cu salario y material (incluyendo auto). Segun motivacion di e decision, ta papia di e urgencia pa continua cu transporte pa anciano y pashent di dialyse. 

REACCION DI E MINISTER 

Segun e mandatario, e ta sigura e portal aki cu nada malo a tuma lugar. Y pio cu ta haci como si fuera ta algo nobo. “Varios luna pasa nos a anuncia esaki caba. For di dia 22 juni 2020 a haci anuncio publico di esaki” e mandatario ta cuminsa bisa. “ Cu awe un politico den santana politico kier hunga politica y kier score for di santana politico ta lamentable. Si e ta haya ta bon pa laga pacientnan sin transporte ta muestra di ki tipo di pensamento y consenshi e tin” e mandatario ta sigui bisa. Segun sr Oduber, na momento cu AZV a informa gobierno cu pa cumpli cu e 5 wave model lo mester termina e contrato cu e compania di transporte y pa evita cu e pacientnan cu ta dialysa cu no tin transporte, keda sin haya tratamento cu consecuencia fatal di por fayece, gobierno a dicidi pa percura pa tin continuidad den cuido pa nan. “Pa evita cu ta bay (tin) aumento (di) gasto pa gobierno di busca mas personal a opta pa esaki” sr Oduber a continua bisando. “ As a matter of fact e Comissie Zorgtoeslag a conseha pa haci esaki” e mandatario a bisa, indicando como tal no ta riba su mes a tuma e decision aki. Y si tin cualkier duda cu e decision ta uno malo, e mandatario a declara tambe:” Nos ta para firme tras di e decision aki pasobra esnan cu ta cuestiona e decision aki mester samina nan consenshi y wak nan mes bon den spiel pasobra e otro opcion e tempo ey lo tabata laga esnan cu ta dialysa keda sin transporte cu consecuencia cu nan lo por fayece. Nos a scoge pa keda duna servicio pa scapa bida di pacientnan cual ta lo corecto pa haci. Bida di hende ta loke ta pisa” e mandatario ta finaliza bisando.

CRITICA 

E critica cu tin cu ta circulando, ta cu no por considera e acto di e mandatario como algo corecto, un conflicto di interes unda cu envez di warda un rapport sali, ta nombra hende, y tur for di su departamento, priviligiando asina un grupo di persona cerca di e minister (pasobra tur a sali di su oficina) pa un periodo di 5 aña. Esnan cu ta critica esaki ta pasobra ta considera esaki como un patronahe politico, y un practica no digno di un gobierno cu ta asina poni riba integridad. A te hasta duna e apodo nobo na e oficina di integridad como ‘e oficina di hilaridad’. Ademas ta bisa cu ta relaciona cu esaki, a core kita e director di AZV Goedhoop algun tempo pasa, pasobra e lo a corta den e deal di AZV pa 'scapa placa'.