Uno di cada 10 auto cu plachi A no tin su impuesto paga debido na Aruba

ORANJESTAD – Diaranzon mainta departamento di impuesto di Aruba DIMP a duna un status pa loke ta number di vehiculo di motor pa 2020. Te cu awor, tin un total tin 88.846 vehiculo di motor registra. Di esaki tin 74.508 tin e pago completo di e impuesto di 2020 cu ta 84% di e total. Ta hopi satisfecho cu e cantidad aki teniendo na cuenta cu cualkier suma riba 80% ta positivo. Asina vocero di DIMP Meverly Romano a bisa durante conferencia di prensa. 

MAS CIFRA

Banda di e 74.508 cu si a cumpli, tin un cantidad cu no a cumpli completamente, y esaki ta 3.948 number cu no tin e pago completo di aña 2020 registra. Esaki kier men cu el a paga solamente e mitar di e aña. Tin tambe 6.419 incumplimento cu ta 100% incumplimento cu tin nada paga di loke ta impuesto di 2020. Esaki ta un total di incumplimento sea parcial of completo di 10.367 number cu no tin pago completo of mitar. E porcentahe ta 11% di e cantidad ey. Y e categoria mas grandi di incumplimento ta den esun di plachi A unda cu tin 3.181 plachi A cu tin pago parcial riba dje, y un total di 5.770 plachi A cu no tin ningun pago registra pa 2020. E incumplimento den e categoria A ta 8.951 plachi cu ta 10% di e cantidad cu tin registra. Esaki kier men cu 1 di cada 10 auto di plachi A, no tin impuesto paga manera mester ta.