Accidente cu hopi daño material y herido na Paradera

ORANJESTAD - Dialuna algo pasa di mey anochi ta sucede un accidente basta serio riba e caminda di Paradera pa bay Piedra Plat. Un poko mas pabou di Bright Bakery, un chauffeur di un pickup blauw chikito tabata bayendo direccion pabou y pa un of otro motibo ta hala na su man robes y ta bay dal frontal contra un Jeep Wrangler cu tabata biniendo di direccion contrario. E impacto tabata basta fuerte cu e chauffeur di e pickup a keda mal pega den e auto. Mesora a pidi pa presencia di ambulance, polis y materiaalwagen di brandweer. Na yegada mesora personal di brandweer a cuminsa cu e trabou nan di rescate. Nan a corta e porta di auto y varios otro parti pa asina por a libera e chauffeur for di den e auto. Despues di basta rato cu brandweer tabata cortando e auto nan a logra saca e chauffeur for di e situacion penoso cu e tabata den. Hero di e auto a troce y a staca su pia. Personal di ambulance despues di a trata e chauffeur di e pickup na e sitio a transporte cu hopi urgencia pa hospital. E dos damanan cu tabata den e Jeep no tabata herida, pero e impacto tabata hopi fuerte cu e airbag di e Jeep a sali. Polis di trafico tambe tabata na e sitio y a atende tambe cu e accidente aki. Ambos auto a haya hopi daño material.