Docternan ta bisa CDC pa alerta cu vacuna pa COVID19 no ta bay ta facil pa ‘deal cu ne’

NEW YORK – Oficialnan di salud y fabricantenan di remedi mester alerta hende cu e vacuna pa COVID19 lo por tin efecto secundario basta pisa, pues mester sa kico ta spera nan y no tin miedo pa haya un di dos dosis. Parce cu mester un di dos dosis pa e vacuna tin efecto. Asina docternan cu a reuni cu Centro pa Combati Malesa (CDC) a informa. Esaki mientras cu estadonan Mericano ta preparando pa distribui e vacuna otro luna caba. 

DOS DOSIS

Segun Dr. Sandra Fryhofer di e American Medical Association a bisa cu tanto e vacuna di Pfizer’s y Moderna’s ta rekeri pa bo tuma dos dosis den varios interval. Como un docter activo, e ta bisa cu e tin miedo cu su pashentnan lo bolbe pa un di dos dosis, si e efectonan secundario potencial no ta placentero  ora cu nan tuma e prome. Segun e docter, mester alerta e comunidad cu esaki no ta bay ta un experiencia facil. 

EFECTONAN

Participantenan durante e periodo di prueba pa e vacuna di tanto Moderna y Pfizer a bisa e medio di comunicacion Mericano CNBC na September, cu nan a sinti keintura halto, dolor di curpa, hopi dolor di cabez, cansancio henter dia y otro simptoma despues cu nan a ricibi e vacuna. Mientras cu e simptoma tabata uncomfortable, y na momento hopi intenso, e participantenan a bisa sinembargo cu despues di un dia, nan tabata bay, y tin biaha mas prome. Pero asina mes e tabata miho cu contrae e virus COVID19. Ambos compania a admiti cu nan vacuna por induci efectonan secundario cu ta similar na e simptoma asocia cu COVID19, manera dolor di musculo, calafrio y dolor di cabez. A bisa cu despues di e di dos dosis, bo mester tuma un dia liber pa bo por recupera di e efectonan. E agencia CDC a bisa di lo traha un guia si un trahado di salud haya e vacuna y bira malo . Potret cortesia Marco Bello | Reuters