Hobennan di Aruba den debate cu hobennan di Bonaire y Curacao

ORANJESTAD - Den cuadro di dia Nacional y Internacional di Derecho di mucha y den cuadro di e proyecto #MyNewWorld di Unicef Nederland, hobennan di Aruba a debati cu hobennan di Bonaire y Curacao tocante diferente ponencia. 

Durante un rueda di prensa di Minister President di Hulanda Mark Rutte, e minister a vocifera cu gobiernonan mester bai scucha e stem di e mucha y hoben mas y asina yega na solucionnan sostenible pa diferente retonan cu nos paisnan por ta encontrado. Esaki a haci cu UNICEF Nederland a crea e proyecto #MyNewWorld. #MyNewWold ta ser organiza na Hulanda, Curacao, Bonaire, St. Maarten, St. Eustatius, Saba y Aruba. Na Aruba Unicef Nederland a acerca Fundacion Telefon pa Hubentud Aruba pa realiza e proyecto aki pa nan.

Na Aruba a selecta 8 hoben di entre 14 pa 18 aña cu ta bishita scol secundario pa participa na #MyNewWorld. Ta trata di 4 cabayero y 4 dama cu ta bin di diferente districto di Aruba y for di diferente etnicidad. E hobennan participando na #MyNewWorld ta: Ariany de Weever, Daniel Jones, Giovanna Carisal, Loui-Angelo Bislick, Jean Croes, Jordan Peterson, Shaneidee Rosaria y Sherona Manuela. 

Despues cu e hobennan a bin hunto pa delibera kico segun nan ta retonan di pais Aruba y tambe presenta posibel solucionnan, nan a ricibi training di con pa debati. Ariba 20 di November, dia Nacional y Internacional di Derecho di mucha, e hobennan di Aruba a debati den un manera virtual cu hobennan di Bonaire y Curacao. E debate den forma virtual a tuma lugar desde e studio di Telearuba. Primeramente e hobennan di Aruba tabata opositor di e ponencia di Bonaire cu ta bisa cu problema di salud mental di hoben mester ser trata na scol. Despues Aruba mester a defende su ponencia cu ta bisa cu sushi mester ser procesa na un manera sostenible. Tambe e hobennan di Aruba a fungi como hurado durante e debate entre Bonaire y Curacao.