COVID19 Taskforce: Mehoracion enorme den comportacion di establecimento y cliente

ORANJESTAD - Dialuna mainta durante conferencia di prensa di Gobierno di Aruba, Prome Minister Evelyn Wever-Croes, a duna di conoce cu e Taskforce a indica un mehoracion enorme especialmente na establecimentonan cu a adapta nan mes na e reglanan pero tambe cu comportacion di clientenan. A nota tambe cu establecimentonan ta acerca Taskforce pa puntra kico por y kico no por y Taskforce ta bay na e establecimentonan pa wak y duna aprobacion. 

COREGI 

Tambe por a constata cu clientenan mes ta coregi y of concientiza otro. Si en caso un cliente drenta sin tapaboca, un otro ta hala su atencion y esaki ta loke nos mester haci. Cada ciudadano mester sa kico su responsabilidad ta. 

TENE CUENTA

Den e temporada bunita aki Gobierno di Aruba hunto cu Crisis Team ta permiti espacio pero na mes momento ta recorda tur ciudadano pa tene cuenta cu tin mas frecuencia di salimento, mas evento social na unda ta bay tin contacto cu mas hende cual ta haci e situacion di riesgo mas grandi.