Wever: Via concientizacion, kier limita eventual resistencia den comunidad pa vacuna pa COVID19

ORANJESTAD – Manera ya raporta anteriormente awe, Aruba ta en espera di e vacuna pa cu COVID19. Pero kico ta pasa si resulta cu un gran cantidad di nos hendenan no kier e vacuna aki, y si e grupo aki tambe ta forma parti di e grupo di riesgo, cu ta e prome pa ricibi esaki. Gobierno inicialmente a bisa cu nan lo suministre na cierto grupo prome, y no tin un plan ainda pa implementa esaki di forma obligatorio. Pero si resulta cu ta necesario, lo tin cu delibera riba e posibilidad aki. 

ENCUESTA 

E portal a confronta e prome mandatario cu e resultadonan inicial di e encuesta riba kico hende ta pensa di un vacuna pa COVID19, cual encuesta a inicia dialuna mainta tempran. Y ya pa ora cu e conferencia a cuminsa algun ora despues, e resultado preliminar tabata mustra cu esaki ta 50-50 practicamente, esta cu mitar di esnan encuesta a bisa cu nan lo participa mientras cu e otro mitar a bisa cu nan no ta bay participa. Mayoria di nan, ta uza argumento cu nan tin miedo di e efectonan secundario. 

INTERES

Segun e mandatario riba su reaccion, a bisa cu mientras cu e interes te asina leu cu nan sa ta halto, pero cu lo yega un ‘stage’ cierto momento cu bo ta bay haya y mira cuanto hende si a hacie y cuanto no. “Y e ora nos tin cu bay tuma decision mirando e desaroyo den mundo henter, si mester bin cu medida pa stimula esnan cu no kier pa tuma e vacuna. Cu vacuna di griep no mester a yega asina leu”. 

CONCIENTISACION

Lo cuminsa si cu campaña di concientizacion pa splica di e beneficio di e vacuna y pa purba kita preocupacion cu tin den comunidad of cierto hende pa cu e efectonan negativo cu e vacuna aki por tin. Ta wardando tur resultado di e test fase pa e ora bisa con efectivo esaki por ta. “Aworaki gobierno no tin un plan ainda pa bay den e fase di forza hende pa tuma e vacuna. Nos ta cuminsa cu e parti voluntario y despues nos ta mira con e desaroyo mundial ta y si mester forza si of no. Si resulta sinembargo cu for di comienzo hasta e grupo vulnerable ta resisti, lo tin cu cuminsa mas tempran cu e medidanan e ora.