Wever Croes: Mester delibera hopi, prome cu por habri frontera cu Venezuela bek

ORANJESTAD – Por lo pronto Aruba no ta habri frontera cu Venezuela, no obstante ta habriendo esaki pa otro paisnan Latino Americano otro luna relaciona cu COVID19. Asina prome minister Evelyn Wever Croes a contesta noticiacla.com dialuna mainta durante un conferencia di prensa. E tema di Venezuela ta riba agenda si pa e Consulta di Reino pa Relacionnan Exterior cu ta tuma diamars mainta na Aruba entre e islanan di Reino den forma Virtual. 

E REUNION

E reunion ta tuma lugar cu presencia di minister Hulandes di relacionnan exterior Stef Blok, cu a yega Aruba dialuna merdia cu avion gubernamental Hulandes, y lo tin participacion di Corsou y St Maarten pero claro di forma virtual. Y aki e tema lo ta sigur riba agenda, aunke no ta kere cu e reunion aki so lo ta suficiente pa clarifica tur cos te pa e habri pa otro luna mescos cu e ta e caso pa otro paisnan bisiña di Venezuela. Por lo menos segun premier Wever Croes. 

FRONTERA CERA

E premier a recorda cu e frontera cu Venezuela a cera prome cu COVID19 a dal Aruba e aña aki. Prome cu esaki, algun luna caba Venezuela a pidi Aruba pa cuminsa papia riba reapertura di frontera, y na comienzo di Maart, net un siman prome cu COVID19 a dal, tabatin e prome reunion preparatorio na Corsou pa wak si ta habri frontera y bou di cua condicion. Aruba tambe a participa activamente. Inicialmente kier a bay djis pa scucha so pero a resulta cu a participa activamente tambe pasobra mester ta parti di esaki pa wak unda ta yega. ‘Recientemente presidente Maduro a bolbe indica cu e fronteranan wordo habri, y nos contesta di Reino tabata ‘wel ban bek na unda nos tabata na Maart. E tempo ey a pone algun condicion basico cu Venezuela no a aproba ainda. Nos ta wardando esey tuma lugar y mi no tin problema pa Aruba sigui participa na e dialogo nan ey. Pero no tin un fecha ainda ki dia ta bay cuminsa bek of algo asina” Wever a bisa. Mes momento e mandatario a bisa cu pa nos na Aruba, ta hopi importante pa señala cu na e momento cu nos habri e frontera, e ta un forma den fase y cu tin un hopi bon control y palabracion cu autoridad Venezolano. “P.e ya caba na aña 2018 nos a pasa den esaki ora cu nos a habri frontera bek, tabata solamente pa transporte maritimo. Y solamente for di un punto, estado Falcon”. A mustra si cu e situacion na Venezuela tin Aruba preocupa, no solamente pa e parti di COVID19 sino pa e circumstancianan bou di cual mayoria di e comunidad y e pueblo ta biba. “Y aki na Aruba, hopi cos a cambia desde di COVID19. Aruba no ta e pais mas cu por para braza habri y ricibi tur hende pa bin, pasobra nos no tin oportunidad ni pa nos propio hendenan” Wever a subraya. Pues ta hopi importante pa crea e structura bek y lanta di e crisis aki pa e ora por yuda. E tema ta riba e agenda pa diamars, “Pero pa aworaki mi no ta premira esey ta bay sosode si. Ta hopi deliberacion mester bin prome!” Wever a finaliza bisando. E potretnan ta di archivo di e reunion similar cu a tuma lugar na Corsou na 2018.