Fanaticonan di banda of publico en general no por para wak e banda toca na un establecimento

ORANJESTAD – Mientras cu a habri e posibilidad pa bandanan por presenta completo riba tarima entrante diamars awor, 24 di November 2020, no ta nifica cu nan por bin cu nan ‘fansnan’ cu ta sigui nan normalmente. Asina prome minister Evelyn Wever a sigura e portal aki dialuna durante un conferencia di prensa dialuna mainta riba COVID19. Ta keda na responsabilidad di e establecimento cu ‘contrata’ e banda of grupo, pa tene nan mes na e reglanan.

GROUPIES

E pregunta tabata debi cu ora cu tin banda ta presenta, nan tin nan fanaticada cu ta sigui nan tur caminda. Ta yama nan ‘groupies’, esta gruponan cu ta sigui e banda(nan) unda cu nan toca. E grupo di persona aki ta presenta na tur toca di e banda(nan) y ta djis para wak y asina, den nan forma, sostene e banda y goza. 

KICO SI POR

E unico forma cu fanaticonan por disfruta di e banda(nan), ta door di bay e establecimento, sinta come of bebe na un mesa eynan. Si no haci esaki, no por presencia e musica di e bandanan en cuestion. 

MULTA?

Si e gruponan aki presenta toch, e grupo no por presenta. Y ta keda na e establecimento cu a boek e grupo, pa tuma accion. Si e banda no para, ora cu nan nota violacion di e regla(nan), nan mes como banda, por haya multa. E establecimento cu a busca e banda, tambe por haya multa.