Bombero: Importadornan di klapchi mester trece mercancia mas tempran

ORANJESTAD - Comandante di Cuerpo di Bombero Aruba, Ing. Edward de Cuba a laga sa na final di e temporada di klapchi cu danki na awasero y actuacion consciente di ciudadanonan no tabata incidentenan grandi; a bende hopi klapchi na Aruba, pero tambe hopi a wordo manda bek Wela. E departamentonan di gobierno encarga cu siguridad, control y maneho di ordo durante di e temporada di klapchi a reuni riba dia 8 di januari pa cera e temporada cu a pasa. Durante di e encuentro e miembronan di e comision di brandweer a discuti puntonan di atencion pa e proximo temporada, esta fin di december 2015.

De Cuba a comenta cu brandweer no a haya nan mes cu candelanan grandi, ni incidentenan impactante y cu esaki ta debi grandemente na e awasero cu a mantene e matanan berde y ciudadanonan cu a sa di maneha vuurwerk na un forma sigur. El a splica cu e comision a ricibi 94 peticion pa punto di benta, pero solamente 77 a wordo uza y di e 26 containernan cu a wordo distribui, seis pa shete a resta. Consecuentemente e deposito di klapchi na Wela ta yen y ta uzando containernan adicional riba e mesun tereno pa warda e resto di e vuurwerk, el a agrega. Comandante De Cuba a bisa cu a bende hopi vuurwerk, pero hopi a wordo importa tambe, p’esey mes a resta asina hopi vuurwerk. El a expresa cu como tin stock ta supone cu importadornan lo pidi menos vuurwerk na 2015.

Pa loke ta trata e puntonan di benta, Comandante De Cuba a bisa cu tur a wordo controla pa miembronan di e comision di vuurwerk y a haya algun fayo atrobe, manera orario pa cera. A atende debidamente cu e rebendedonan cu a faya. Miembronan di e comision a ripara cu e rebendedonan a tuma bon nota y cumpli cu rekisitonan manera con pa traha e bentana den e container.

Un problema cu a ripara na diferente rebendedo ta con nan tabata laga desperdicio tira banda di e container y lo atende esaki durante e proximo reunion cu e importadornan. Un otro punto cu tambe lo trece dilanti cu e importadornan ta e instruccionnan riba e pakinan di vuurwerk, cu mester ta comprendibel y facil pa lesa.  Cuba a comenta cu a dicidi di organisa e prome reunion cu e importadornan mas tempran den aña y pidi nan pa haci tur esfuerso pa logra trece nan vuurwerk mas tempran pa trabaonan tuma luga mas trankilo y mas sigur posibel. El a splica cu aña pasa – aunke el a wordo causa pa problemanan den exterior, e containernan a yega laat y e trabaonan mester a wordo haci hopi lihe, cual ta duna tambe oportunidad pa erornan wordo haci. Algun cos no a bay completamente segun regla y mester haci maximo esfuerso pa e margen di eror ora ta traha cu klapchi ta mas chikito posibel, De Cuba a subraya. El a expresa cu loke ningun hende kier pa pasa ta pa tin fayo. Cada fayo chikito ta montona hunto y ta bira uno grandi y desgracia ta pasa door di fayo, De Cuba a bisa. Cuerpo di Bombero a keda satisfecho cu no tabatin incidentenan pisa y cu e temporada pasa a bay relativamente trankilo.