Servicio di certificado di salud di DVG cera pa motibo cu trahado a test positivo pa COVID19

ORANJESTAD - Desde awe e servicio di Departamento di Salud Publico cu ta maneha peticion y entrega di certificado di salud of tambe yama ‘carchi berde’ ta cera te cu proximo aviso. Esaki ta necesario despues cu un empleado a test positivo pa COVID19. 

Na e momento aki ta ehecutando tur investigacion necesario pa manda den cuarentena esnan cu ta traha abase diario y mas di cerca cu e empleado. Manera cu e situacion na pia di trabou ta uno sigur pa demas empleado y comunidad, nos lo informa debidamente e dia cu e servicio lo ta disponibel atrobe.