CAft: Spaarmento di 5 miyon mensual den AZV ta sigui den 2021

CAft: Spaarmento di 5 miyon mensual den AZV ta sigui den 2021

Posted on 11/20/2020 11:47 am AST | Updated on 11/20/2020 11:48 am AST

DEN HAAG/ORANJESTAD – E medida imponi pa conseho di minister di Reino (RMR) na Aruba pa reduci 5 miyon di AZV pa luna ta keda vigente tambe den 2021. Asina presidente di e colegio di supervision financiero CAft Raymond Gradus a contesta den e programa Noticiacla LIVE diahuebs anochi. Por lo menos esey ta e conseho di e colegio na RMR. Ademas el a clarifica cu contrario na pensamento di e sector medico na Aruba, E suma cu CAft a sugeri na RMR pa wordo reduci den AZV, ta enberdad 5 miyon pa luna, y no pa aña. 

PAKICO SPAAR SUMA ASINA CUANTIOSO DEN CUIDO MEDICO

E preguntanan pa e presidente tabata dirigi pa haya claridad riba varios punto di e tema rond di e seguro medico general. Entre nan, pakico a scohe net AZV pa implementa e spaarmento aki, siendo cu den un crisis di COVID19 ta net e ramo aki ta mas vital. Tambe pakico un suma asina grandi cu ta debilidad e forza di e seguro medico general aki. Segun profesor Gradus, ta conoci cu pa añanan largo Aruba tin e discusion riba e problema pa contene e gastonan di cuido medico. E ta haci mencion di inversion den compra di medicina, tarifa di cierto medico specialista y mas. E suma di 5 miyon pa luna of (den e caso aki) pa e aña aki 35 miyon total, ta realizable. Segun Gradus, CAft a reuni cu e instancia aki (AZV). “Y nos no a haya e impresion (durante e reunion cu AZV) cu e spaarmento di placa lo ta imposibel” Gradus a sigura e moderador Laclé den e programa.

5 MIYON OF 35 MIYON

Loke tambe profesor Gradus a clarifica, ta cu contrario na pensamento di e grupo di medico cu a protesta publicamente riba e cifra, e suma cu CAft a conseha tabata 5 miyon pa luna y no pa aña of pa pag’e den un biaha so. Gradus a splica cu e no tabata na altura di e carta di critica unda cu e grupo medico ta bisa cu RMR a cambia e conseho di 5 miyon pa un biaha, den 5 miyon cada luna, pero a sigura si cu ta un suma mensual y no anual. “Mi sa solamente cu RMR a palabra cu 5 miyon mensual desde 1 di juni (2020) y esey ta 35 miyon hunto. Pesey mi ta papia di 35 miyon” Gradus a bisa. Loke e no por garantiza ta cu si enberdad e suma di 5 miyon inicial a keda realiza manera tabata e intencion. E portal aki a compronde mientrastanto cu esaki si tabata e caso.  

EFECTO RIBA COVID19

Segun Gradus, a tene cuenta tambe cu den e conseho pa e ayudo di likidez, di con pa yuda cu e gastonan pa combati COVID19, mirando cu ta necesario cu Aruba mester haci gasto riba e tereno aki obviamente. “Esaki ta los di e suma cu nos ta pidi pa luna (di 5 miyon)” Gradus a bisa (refiriendo na e 5 miyon mensual), indicando cu ta trata di un asunto cu tabata den discusion pa hopi tempo caba na Aruba. “Pero nos a bisa si, cu si ta trata di extra cuido medico relata na COVID19 den cuadro di e ayudo di likidez, cu ta duna un suma extra pa Aruba den e caso aki". Cu esaki e profesor ta bisa cu e spaarmento di 5 miyon mensual, lo no ‘stroba’ combatimento di COVID19 na Aruba.

TOT NADER ORDER

Pa loke ta continua di e medida, Profesor Gradus a confirma cu esaki lo continua tambe den 2021, pues no mester pensa cu pa cambio di aña esaki lo cambia na januari 2021. 

  • Powered by SETAR