Cu RAft, CAft ta bay yuda controla e entidadnan di gobierno

DEN HAAG/ ORANJESTAD – Unabes cu e ley di reino, e asina yama Rijkswet Aruba financieel toezicht (RAft) drenta na vigor, e Colegio di Supervision Financiero pa Aruba (CAft) por usa esaki pa supervise e entidadnan di gobierno di Aruba. Algo cu aworaki no ta explicitamente regla den e Landsverordening Aruba tijdelijk financieel toezicht (LAft). Ademas e colegio lo cuminsa uza e RAFt como nan base, cu ta pone cu automaticamente e ley actual LAft lo bira ‘innecesario’. Asina e presidente di e colegio, profesor Raymond Gradus a confirma den e programa Noticiacla LIVE diahuebs anochi. Mientras cu e RAft no ta varia mucho di e LAft, e tin mas punto y ta brinda mas claridad. El a referi por ehempel cu como e LAft ta un decreto nacional esaki a trece e confusion si CAft mester raporta na Staten di Aruba of na Rijksministerraad (RMR). Awor Raft ta un ley di reino, y CAft ta un organo di reino, pues ta cla cu lo raporta na RMR como organo di reino.

RAFT TA REEMPLAZA LAFT

“Na momento cu e RAft ta anuncia den e boletin oficial di Aruba, nos lo cuminsa eherce supervision (financiero) a base di e RAft” profesor Gradus a sigura Tito Laclé pues cu a conduci e entrevista. Den esencia e diferencianan (entre LAft y RAft) lo ta limita, pero e hecho cu e supervision financiero ta regla na nivel di reino, ta haci e proporcion (di e trabou) mas cla y puro. E presidente no ta kere si cu mester considera e ora cu e LAft a bira ‘anticua’ compara cu e version di e Raft, pero si ta di acuerdo cu unabez cu e RAft drenta na vigor, e LAft ta bira innecesario (‘overbodig’). Na mes momento profesor Gradus ta remarca cu e supervision cla ariba nivel di reino lo duna un bon señal na e Mercado financiero internacional como tambe rating agencies.

SUPERVISION RIBA ENTIDAD DI GOBIERNO

E RAft tambe lo bay tene supervision riba entidadnan di gobierno cu ta algo cu no tabata e caso anteriormente. “Awor tin manera pa haci esaki (den e RAft)” profesor Gradus a sigui bisa. Ademas e ta referi na e asina yama codigo di ‘Corporate Governance’, cu lo haci cu gobierno di Aruba mes lo eherce un cierto nivel di supervision, pero CAft awor tambe tin un responsabilidad pa cu esaki. “Y Aruba mester raporta ariba na CAft cu e ta bon regla, y cu e instancianan manera Serlimar por haci nan trabou di un manera efectivo, riba distancia y cu reglanan cla” e presidente a sigui bisa.