Hulanda ta aporta cu personal pa yuda Aruba vigila su frontera

ORANJESTAD- Hulanda ta aporta cu personal pa yuda cu Pre Clearance pa Aruba. Ta trata aki di personal di 6 persona cu ta yuda Aruba optimalisa e vigilancia di frontera. Tabata diabierna siman pasa cu comandante di Marechausse drs.Hans Leijtens tabatin un encuentro cu Prome Minister di Aruba. E bishita tabata enfoca riba vigilancia di frontera y e deseo di Aruba pa introduci na Aeropuerto un Pre-Clearance pa Europa. Un concepto cu for di un inicio Prome Minister a pidi atencion p’e na Den Haag.

Na su salida di oficina di Prome Minister Eman, Leijtens a splica cu un bes pa aña e ta bishita tur su unidadnan den e region Caribense. “Mi ta trata mas tanto posibel di bishita tur isla y tur tres pais. Mi ta papia cu mi coleganan militar y na mes momento mi ta tuma e oportunidad pa papia cu e autoridadnan concerni. Cu Eman mi a papia riba vigilancia di frontera na Aruba y e desaroyonan den e futuro cercano. den e mesun contexto ey nos a papia tambe riba Pre-Clearance cu tin tur atencion di Hulanda.”

Pa loke ta e topico Pre-Clearance Leijtens a bisa cu a keda palabra cu Hulanda ta bay sostene Aruba den e desaroyonan riba e tereno aki. “Hunto cu Aruba nos a wak aña pasa riba e situacion actual, entro otro con cosnan ta canando awor y si nan por sigui den e Pre-Clearance.