CBA: E percepcion di negoshi na Aruba ta keda pesimista

CBA: E percepcion di negoshi na Aruba ta keda pesimista

Posted on 11/19/2020 4:41 pm AST | Updated on 11/19/2020 4:47 pm AST

ORANJESTAD - Banco Central di Aruba (BCA) recientemente a conclui e encuesta di percepcion di negoshi pa e di tercer trimester di 2020. E encuesta di percepcion di negoshi ta evalua e percepcion economico y confiansa di e negoshinan local, como tambe e impacto continuo causa pa e pandemia di COVID-19 riba condicionnan economico y actividadnan di negoshi.

Despues di un mehoracion chikito den e di segundo trimester, e asina yama ‘Business Perception Index’, cu ta consisti di e indicenan di condicionnan economico actual y condicionnan economico a corto plazo, a baha cu 0,7 punto di indice te na 93,3 durante e di tercer trimester di 2020. E ‘Business Perception Index’ total ta indica un caida marginal den e confianza di negoshinan, compara cu e trimester anterior (Grafiek 1)2. E cambio den e confianza di e negoshinan ta debi na reduccion den e condicionnan economico actual y a corto plazo.

 

Fuente: Banco Central di Aruba

E indice di condicionnan economico actual a baha cu 0,2 punto di porcentahe te na 92,3 compara cu 92,5 den e di segundo trimester di 2020. E indice di condicionnan economico a corto plazo a registra un deterioracion di 1,5 punto di indice, esta for di 96,4 den e di segundo trimester di 2020 te na 94,9 den e di tercer trimester di 2020 (Tabel 1). E porcentahe di encuestadornan cu ta premira un crecemento economico negativo den e siguiente 12 lunanan, a nota un caida di 16,6 punto di porcentahe te na 70,2 porciento.

1 E version original na Ingles ta prevalece,

2 E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu negoshinan no ta ni optimista, tampoco pesimista, pero ta neutral den nan pensamento di desaroyo economico na Aruba. Entre 100 y 110, e indice ta mustra un situacion di optimismo den pensamento di negoshinan

Pa locual ta e impacto causa door di e pandemia di COVID-19, BCA a amplia e encuesta di percepcion di negoshi, pa asina tambe evalua e impacto ariba benta di negoshinan, necesidad pa aplica pa fondonan di emergencia y e impacto economico.

Casi 42 porciento di e negoshinan den e encuesta (41,5 porciento) a indica cu e pandemia di COVID-19 a sigui tin un impacto significante riba e benta di nan negoshi, 8,0 punto di porcentahe menos compara cu 49,5 porciento den e di segundo trimester. Aproximadamente 65 porciento di e negoshinan encuesta (64,9 porciento) ta premira cu e impacto causa door di e pandemia di COVID-19 lo dura mas cu 12 luna. Pa locual ta e necesidad pa aplica pa fondo di emergencia na negoshi brinda door di Gobierno di Aruba, 33,0 porciento di e encuestadornan a aplica pa e fondo aki durante e di tercer trimester, compara cu 41,8 porciento cu a aplica durante e di segundo trimester.

E informe completo di e encuesta di percepcion di negoshi ta disponibel riba website di BCA (https://www.cbaruba.org/).

 

Fuente: Banco Central di Aruba

  • Powered by SETAR