Autoridad a tuma accion contra señora bibando cu yen cacho den situacion a higienico

ORANJESTAD – Basa riba un tip, departamento higienico di Departamento di Salud (DVG) a tene un accion na un cas na Paradera, unda cu nan a bin haya un situacion terible y hopi a higienico. Esnan cu a presenta tabata e.o. KPA, Bureau City Inspector, Veterinaire Dienst y mas departamento cu a haya nan mes ta actua ora cu nan a mira e situacion: Hopi cacho den situacionnan deplorable, cacho sin acceso na awa, mara na cadena cortico, lugar sushi, raton tur caminda. Ora cu tabata na e sitio, a dicidi tambe di envolvi Directie Infrastructuur en Planning (DIP), pa tambe ta envolvi. 

CACHONAN

Entre tur e cachonan a dicidi di bay cu dos cacho prome, cu tabata mustra morto di sed. Un di nan a te hasta purba bebe awa den un plas di lodo. Asina desespera e cacho tabata. E persona en carga, e conocido Kiki, a wordo atendi riba e situacion. E ta conoci pa rescata cacho pero no tin e fondonan pa haci esaki y ta haci e situacion mas pio ainda envez di yuda. No a logra bay cu tur cacho, ya cu no tabatin lugar suficiente pa hiba nan. 

TESTIMONIO

Testimonio di un bisiña ta mustra cu e persona en cuestion, ta hopi a higienico, y ta haci su necesidadnan den bista di tur hende, ta baña pafo, den bista di tur hende y bisiñanan ta desespera cu e situacion. Lamentablemente autoridadnan no por a haci nada otro cu papia cu e persona, y a solamente atende e persona riba e situacion cu nan a haya eynan. Esnan den becindario tabata contento cu por lo menos tabatin un intento pa haci algo y ta spera cu esaki ta comienzo di un accion cu por pone e situacion eynan keda resolvi pa semper. No ta prome biaha cu e persona aki ta den noticia pa cu situacion deplorable di bestia (particularmente cacho).