CBS: Faltando 2 siman, Censo 2020 a conta 50% di Aruba

ORANJESTAD - Manera ta conoci den e luna di October Censo 2020 por a wordo completa online of via telefoon. Desde 1 di November 2020 a cuminsa cu e parti di bishita di cas pa cas. Den e prome 2 simannan cu a pasa, un total di 21.213 adres a wordo bishita cu un average di 250 tellers. Un total di 20.489 hogar y un total di 57.998 persona a wordo conta . 

Teniendo na cuenta e parti di nos poblacion cu a wordo conta den e luna di October y durante e prome 2 simannan di November, un 50% di nos poblacion a wordo conta. Teniendo na cuenta cu 2 siman mas falta pa Censo2020 finaliza, CBS a opta pa habri e posibilidad di yena e cuestionario di Censo2020 online bek. Esaki ta posibel bek di 20 pa 30 di November 2020. Pa cu esaki e Help Desk di Censo2020 lo ta activo bek entrante 20 di November di 8 or di mainta te cu 8 or di anochi. E number di e help desk a keda: 524-7444. 

E parti di bishita di cas pa cas tambe ta sigui te cu 30 di November 2020.

CBS kier a tuma e oportunidad pa pidi e cooperacion di e pueblo di Aruba. Awor mas cu nunca ta di sumo importancia pa e desaroyonan cu a y ta tumando lugar den nos poblacion pa asina nos por planifica abase di datonan real y confiable y abase di situacion actual cu ta tumando lugar den nos comunidad pa asina nos por planifica un mihor futuro pa nos tur.