Acuerdo di Landspakket a wordo manda pa Parlamento

ORANJESTAD - Prome Minister Evelyn Wever-Croes, pa medio di un carta dirigi na Presidente di Parlamento, Señor Ady Thijsen, a manda Parlamento e acuerdo di Landspakket cu a wordo firma diabierna 13 di November, 2020 cu Hulanda pa loke ta trata e sosten di likidez pa e di tres tranche. 

ACUERDO FIRMA

Manera ta conoci, Ddspues di lunanan intenso y no facil pa Gobierno di Aruba desde cu COVID19 a dal mundialmente, diabierna ultimo Gobierno di Aruba a firma acuerdo cu Hulanda. Cu esaki gobierno ta bisa tambe cu Aruba a drenta un etapa caminda cu tin mas trankilidad riba e tema financiero y tambe un etapa caminda cu por cuminsa reconstrui Pais Aruba. Banda di esaki, Hulanda lo brinda Aruba sosten pa reactiva nos economia y mas seguridad na nos frontera. 

COHO

Siman pasa durante Rijksministerraad a bay di acuerdo cu e contenido di e propuesta di e entidad nobo Caribisch Orgaan voor Herstel en Ontwikkeling (COHO). Siguientemente; Aruba lo haya e 209 miyon florin e siman aki, un fianza na 0 porciento di interes cu lo cuminsa paga bek na 2022. E tercer instalacion aki ta pa e periodo di 1di juli te cu 31 di December 2020.

KICO A WORDO ACORDA

E rijkswetten cu a wordo acorda esta: (1) supervision financiero/ Rijkswet Aruba Financieel Toezicht (RAFT) y (2) pa Caribisch Orgaan voor Herstel en Ontwikkeling (COHO), ta bay Raad van State y Raad van Advies (organonan consultativo) di Reino y di Aruba pa duna nan conseho riba e dos leynan aki. E consehonan aki ta bay pa Gobierno(nan) tene cuenta cu nan y despues pa e Parlamentonan. 

CUMPLIMENTO ESSENCIAL

Cumplimento cu e condicionnan di e Rijkswet ta esencial pa ricibi proximo instalacionnan di sosten di likides financiero (liquiditeitssteun). Cu e acuerdo cu a yega na dje, Hulanda lo sigui extende e prestamo reparti den diferente quota te na 2025.