Encuesta: Mayoria no kier pa stop tiramento di clapchi na Aruba

ORANJESTAD – Tiramento y cumpramento di clapchi mester sigui manera cu e ta aworaki. Asina mayoria di esnan cu a participa (38%) den e encuesta mas recien di noticiacla riba e tema a indica. Mes momento sinembargo, e opcion pa reduci e tiramento di clapchi na solamente un dia tambe a haya basta sosten (21%). Nan ta prefera tambe pa enfoca mas riba shownan profesional di vuurwerk. E opcion pa ‘elimina’ henter e proceso di benta y tiramento di clapchi na Aruba a haya menos sosten cu tur (12%). Pues tin un resistencia fuerte entre esnan cu a participa den e encuesta, y no kier tende pa stop tiramento di clapchi na Aruba. Un total di 1105 persona a participa na e encuesta aki durante 4 dia.

KEN KIER KICO

Interesante ta cu for di e grupo di edad mas hoben (18-24) cu a participa, 70% a pidi pa no cambia nada, mientras cu e grupo di edad mas grandi 55-64 di edad y 65 aña di edad y mas halto respectivamente cu ta 21 y 16% respectivamente, kier pa prohibi tiramento di clapchi na Aruba. Pero e grupo aki tambe, 22 y 19% respectivamente, si mester tira clapchi, ta prefera pa tira esaki riba un solo dia y nan ta prefera pa tin un show di vuurwerk tambe. E grupo di hoben di 18-24 aña ta esun cu mas resistencia pa para tiramento di clapchi (8%). E grupo di edad 55-64 aña y 65 aña y mas halto ta esun cu menos kier pa mantene e situacion manera cu e ta y nan ta 20%. 

UNDA KIER CAMBIO

Den e encuesta tambe a pone e districto. Aki tambe tin datonan interesante unda cu ta mustra segun e resultado di e encuesta cu esnan di Noord y Oranjestad respectivamente, ta mas habri pa cambio (fecha di un dia so di tira clapchi y show profesional di vuurwerk) y ta 25 y 22% respectivamente. E otro districtonan no ta asina pro pa e cambio aki unda cu Savaneta y San Nicolas respectivamente no kier cambio (44 y 43% respectivamente).