Conocido comediante y actor Sinbad a sufri derame cerebral

HOLLYWOOD – E comediante y actor popular (pa Aruba tambe) David Adkins, miho conoci como Sinbad a sufri un derame cerebral, segun su famia a confirma pa e portal ‘The Hollywood Reporter’. No tabata conoci con severo e artista di 64 tabata afecta. “Ta debi na e amor cu nos tin pe, nos ta comparti cu Sinbad, nos querido casa y tata ta recuperando di un derame cerebral recien” E mensahe di famia ta bisa. Sinbad a cuminsa cu su proceso di recuperacion y famia ta convenci cu e lo trece alegria bek pronto pa tur hende. Sinbad ta e creador di loke awe ta conoci como Soul Beach Music Festival na Aruba cu ta un festival anual cu ta genera turista di afro americano tur aña den luna di mei. 

SINBAD NA ARUBA

Tabata na 1998 cu pa prome biaha Sinbad a presenta su Soul Music Festival cu a keda graba pa HBO den e actual Guillermo Prospero Trinidad Stadion. For di e tempo ey, cu excepcion di algun aña, e organisacion a organisa 19 edicion di loke a bira Soul Beach Music Festival na Aruba. E ruman homber Mark Adkins ta esun cu a tuma e festival over y a bin ta organiza esaki tur aña pa Aruba.