ORANJESTAD – Diasabra anochi Minister Xiomara Maduro a presencia e concierto dedica na sr. Carlos Bislip pa conmemora su 40 aña dedica na musica. Durante e concierto aki, Minister Maduro a sorpresa Carlos cu un reconocemento pa su guia y aporte positivo na e formacion musical di nos hobennan talentoso di Aruba.
CARERA MUSICAL DI CARLOS
Carlos a descubri su pasion pa musica for di edad jong. Despues di a tuma les cerca tocadonan di drummer internacional cu tabata toca na nos hotelnan, el a dicidi cu e ta bay sigui studia musica na un di e miho universidadnan renombra di musica, cu ta Berklee College of Music na Boston. Carlos a termina su estudio na Berklee y a haya su diploma di Performance Major cu Drumset como instrument principal. Despues el a sigui prepara su mes profesionalmente y a obtene su Masters Degree den Arts Administration na Boston University. Na momento cu Carlos a regresa Aruba la bay traha dunando les na Arubaanse Muziekschool Rufo Wever.
Carlos tin un carera musical impresionante, e ta motor y organizado di varios Concierto y Festival. Alaves e ta e organizado y presentador di UNESCO International Jazz Day Concert. Tambe el a funciona como Director Artistico y Musical di hopi orchestra pa eventonan importante manera celebracion di 25 aniversario di Status Aparte y na Concierto Bushiribana na honor di e bishita di nos Rey Willem Alexander y Reina Maxima. For di aña 1990 e ta organiza e ‘Serie di Concierto di Scol di Musica Rufo Wever’ locual e ta haciendo te awor y ta conoci tambe pa e ‘camp’nan di musica cu tur aña e ta organiza pa e hobennan. Carlos a comparti tarima cu masha hopi musico internacionalmente conoci, pa djis menciona algun, e vocalista di jazz sra. Adela Dalto, e trompetista di Jazz Tropical sr. Humberto Ramirez, e conocido timbalero Mariano Morales, e pianista di Jazz Tropical sr. Aloisio Aguiar y tambe e nominado y tambe e nominado na Grammy Award sr. Edsel Gomez.
Minister Xiomara Maduro ta remarca cu e lista di e carera musical di Carlos ta hopi largo, pero locual mas ta sobresali den e lista aki ta su amor pa musica, e amor pa su trabou y e abilidad cu e tin pa siña, guia y motiva specialmente nos hobennan riba e tereno di musica.
UN BALUARTE DEN CULTURA
Na ocasion di e celebracion di 40 aña den musica Minister Xiomara Maduro ta felicita y ta gradici Carlos pa e añanan cu ela dedica na e arte di musica. Minister di Cultura ta yama Carlos danki pa inspira, motiva, guia y contribui na e formacion musical di nos hobennan talentoso di nos Pais. Na nomber di Gobierno y pueblo di Aruba, Minister Maduro a entrega Carlos un plakaat di reconocemento pa su gran aporte na e herencia cultural di nos Pais.
ORANJESTAD – Recientemente e team di Wings of Hope (WOH) cu ta forma parti di Aruba Airport Authority N.V. a organisa e di dos AUA Airport Runway Run riba diadomingo 17 di maart 2024, caminda un total di 125 coredo a duna bek na comunidad di un manera inolvidabel.
ORANJESTAD - Dia 18 di maart Aruba henter ta celebra Dia di Himno y Bandera. Dos simbolo di nos autonomia, identidad, libertad y union.
ORANJESTAD - Fundacion Kapel di Bethania – FKB, ta habri portanan di Klooster Imeldahof pa henter pueblo di Aruba riba ‘Dia di Himno y Bandera’ 18 di maart for di 9:00 am pa 2:00 pm. Un y tur lo tin e posibilidad pa haya experencianan varia riba e dia di celebracion aki.
ORANJESTAD - Hilton Aruba Caribbean Resort & Casino a introduci e Tree of Giving na 2020 manera un forma pa duna bek na comunidad. Bishitantenan por contribui n’e Tree of Giving situa den e lobby di Aruba tower, pa medio di cumpra un poinsettia plant durante e luna di december. Tur e ganashi colecta ta bay directamente pa asisti e isla su banco di cuminda, FPNC, Fundacion Pa Nos Comunidad, www.fpncaruba.com.
ORANJESTAD - Señora Nena a nace na 1936 na Colombia bao di e nomber di Edith Elvira Fawcet.