Total di 14 studiante di polis a ricibi nan diploma di nivel 3

ORANJESTAD – Un total di 14 studiante di polis a ricibi nan diploma di nivel 3 den un ceremonia special y diferente e aña aki pa motibo di reglanan di COVID-19. Na Scol di Polis E.J. Watty Vos a tuma lugar un Drive By. Cuerpo Policial Aruba ta orguyoso un biaha mas cu den total di 14 studiante di klas 2018 ta logra termina nan dos aña di estudio y awor ta ricibi nan diploma nivel 3 pa wordo promovi pa agente di primera rango (agent eerste klasse).  Alavez 1 studiante di klas 2016  cu a termina su studio policial nivel 4 exitosamente cu pronto lo wordo promove pa Brigadier. 

Cada studiante compaña cu nan famia a presencia un momento inolvidabel na unda un miembro di famia awor ta polis. Despues cu e studiante a firma su diploma. E studiante a haya e diploma for di man di Ministro Andin Bikker, alto comisario di polis Sra. Vanessa Tjon-Kock den presencia tambe di hefe de scol di polis E.J. Watty Vos Sra. Jeannete Richardson-Baars.

E organisacion ta hoben pero tin un solo meta en comun pa brinda e seguridad, combati criminalidad y pa sirbi nos pais. A felicita Klas 2018 cu awor ta sigui un etapa importante pa aki 2 aña nan tambe por termina nan studio policial exitosamente!.