Compania ta anuncia vacuna pa COVID19 cu 94.5% exito

NEW YORK – E compania farmaceutico ‘Moderna’ e siman aki a informa cu nan a desaroya un vacuna contra COVID19 cu ta preveni 94.5% di hende pa contrae e virus aki. Esey ta mas cu e 90% cu e compania Pfizer a informa siman pasa ainda. Segun e compania Moderna, e vacuna aki ta traha pa tur grupo di edad y ta generalmente sigur. A haci prueba riba 30 mil persona na Merca. E ta inclui 95 pashent cu tabatin casonan confirma di COVID19 di cual 90 a ricibi e placebo y 5  a ricibi e vacuna activo. Tabatin 11 caso di coronavirus severo pero niun a ocuri den esnan cu a wordo immuniza.     

APROBACION

Moderna su intencion ta pa aplica pa un autorizacion di emergencia cu e agencia federa Food and Drug Administration y lo somete mas data riba e efectividad y seguridad di e vacuna. Cualkier efecto secundario lo ta leve y modera segun Moderna.  Segun Moderna, ta for di januari nan ta trahando riba esaki cu e intencion di proteha mas hopi hende posibel rond di mundo. Si logra haya e permiso, e compania ta premira cu pa e aña aki ainda nan por produci 50 miyon dosis, cu ta suficiente pa proteha 25 miyon hende y despues produci te cu 1.3 biyon dosis pa 2021.