SAC: No tin ningun deal entre SAC y SMAC pa traha hunto!

ORANJESTAD – No tin ningun ‘deal’ entre SAC y SMAC traha y tampoco peticion pa SAC organisa mas evento carnavalesco. Presidente di SAC, Tecla Kelly a aclaria na NoticiaCla.com riba un situacion cu por a presenta pa medio di un foto cu a keda publica, unda cu ta aparenta cu tur cos ta ok entre e dos organisacionnan di Carnaval. Unico cos cu a sosode durante un encuentro inicia pa SAC, ta pa informa SMAC cu SAC no tin problema pa e reina y prinsnan baha corona di SAC y participa den e coronacion awor di SMAC. Nada mas. 

Tabata ayera den dia cu e presidente di SAC a dicidi di yama e presidente di SMAC Randy Thiel pa bin na nan sede, y aclarea e asunto di reina y prins cu pancho. Tabatin rumornan pasando rond, -segun Kelly-, cu un carta lo ta circulando cu ta prohibi e reinanan y prins cu panchonan (cu ta di SAC) pa participa den carnaval, organisa pa SMAC. “Esaki no ta berdad. Como tal mi a dicidi di invita e presidente pa un combersacion y splica un ke otro” Kelly a bisa NoticiaCla.com . Cu nan (SMAC) a cana bin cu henter un delegacion, no tabata e intencion di SAC, pasobra ta e presidente di SMAC so nan a invita. Y inicialmente Kelly no kier a saca potret pero a dicidi na final pa haci tal toch.

E rumor awor cu SAC lo a pidi SMAC un permiso pa organisa un of otro evento durante e periodo di carnaval tampoco no ta cuadra. “No ta berdad! SAC no a pidi nada!” Kelly a bisa enfaticamente. Y pa loke ta un deal entre nan dos, tampoco. Esaki pasobra SAC ta considera esey un asunto di pasado. SAC a ofrece SMAC 7 posicion den e organisacion di SAC, pero SMAC a rechasa esaki. Como tal no tin nada di papia di deal, y SAC no ta interesa tampoco pa traha cu SMAC. “Nan tabatin e chens y no a tume”. Cu e potret a lanta hopi stof, ta un hecho y como tal a bay busca informacion pa confronta Kelly cu e rumornan y tambe check kico a sosode exactamente ayera nochi ora cu e delegacion di SMAC y SAC a topa otro na e sede di SAC na Dakota. Foto cortesia SMAC.