Organisacion Cabayista Arubano a anuncia Interpaso 2014

ORANJESTAD - E exito di Aruba den e recien Mundial di Confepaso di Jinete & Amazona cu a tuma luga na e ciudad di Pereira a tira un luz hopi fuerte y positivo riba nos isla y tambe riba Aruba su feria internacional anual “Interpaso”. E interes internacional pa Aruba despues di e resultadonan exitoso di nos muchanan, tabata practicamente mesora. Cabayistanan di exterior kier cuminsa blokia e fecha pa asina nan por ta presente pa participa y na Aruba tambe a cuminsa puntra si ya Organisacion Cabayista Arubano a fiha un fecha. “Interpaso 2014” ta tuma luga entre 26 pa 28 di September na Villa Floralina.

Presidente di OCA, Alex Cybul tin un reunion importante cu e director general di Instituto Colombiano Agropecuario (ICA) riba dialuna dia 28 proximo na e capital Colombiano pa yega na un entendimento concreto di cooperacion. E ultimo biaha tabatin hopi complicacion cu e salida y re entrada di e cabaynan Colombiano. Esaki a causa molester y inconveniencia grave pa e cabayistanan cu a trece nan cabay pa competi na Aruba y despues ta regresa nan pais. Ta spera cu un contacto personal lo por crea un miho laso di confianza y cooperacion cu lo beneficia e intercambio deportivo na fabor di e deporte di e cabaynan di paso Colombiano.

Durante e mundial a lanta un curiosidad grandi di con Aruba como isla asina chikito y cu asina poco cabay ta logra resultado asina impresionante cu su muchanan den e Mundial. Cu e 3 medayanan di oro, ta Colombia so a logra cu 5, tabatin mas medaya di oro cu Aruba. Aruba a bay cu 16 participante y Colombia cu 76. Den e total di medaya Aruba a logra e tercer luga, contra paisnan manera Merca cu a participa cu 37 atleta y Puerto Rico cu 42. Nan tabatin 2 medaya di oro cada un.

Tin algun cabayista cu kier trece nan cabaynan cu ta mundialmente conoci pa competi na Aruba, loke lo duna un realce enorme pa e competencia y esey na su turno ta atrae cabayistanan di henter e region pa bin presencia e feria na Aruba. E cabaynan cu lo bin Aruba ta “Atractivo de la Piramide”, cu tin e status Fuera de Concurso y pa dos aña consecutivo e tabata “El Caballo de Año”. E otro ta “Barbaroja” cu na e momento aki ta considera como e cabay no.1 pa e titulo di “El Caballo del Año”. Esaki ta nifica cu cabaynan di Aruba lo mester train duro pa topa e reto aki.