ORANJESTAD - Fundacion pa Hende Muhe den Dificultad recientemente a ricibi e Comision Permanente di Parlamento pa Asuntonan Social y di Famia cu kier a haya un orientacion riba kico tur e fundacion aki ta encera demostrando asina e importancia y responsabilidad social pa esnan den dificultad.
Fundacion pa Hende Muhe den Dificultad e luna aki ta cumpli 25 aña haciendo trabou nan grandi pa yuda hende muhernan y hende homber den dificultad di violencia domestico.
Danki na fondonan di Hulanda, pronto por expande proyectonan pendiente cu ta encera 6 unit nobo den e prome fase. Despues tin pensa di agrega 10 mas pa e bira 16 en total. Durante e bishita aki Sra. Magaly Maduro, Coordinadora di e fundacion, a elabora riba tur e trabou nan di FHMD y e proyectonan a corto plazo y contesta preguntanan mas detaya encuanto di e statisticanan di e fundacion.
Ademas a splica e comision di e otro trabou nan di informacion y concientizacion cu fundacion ta haci door di diferente charlanan cu ta tene na entre otro scol pa Polis, na scolnan y na pia di trabou.
A elabora ampliamente ariba e importancia di registracion di casonan pa por midi esaki den full e problematica di Violencia Domestico. Despues di a intercambia cu otro e miembronan di Parlamento a ricibi un recorido rond di e fundacion na unda nan por a mira e tereno riba cual e expansion di e Shelter ta bai tuma lugar. Fundacion pa Hende Muhe den Dificultad ta contento di a ricibi fondonan for di Hulanda pa por amplia e capacidad pa por atende mas cliente cu aworaki.
Riba e potret por mira Coordinadora di Fundacion pa Hende Muhe den Dificultad cu e miembronan di Staten di Aruba.
ORANJESTAD – Actual parlamentario independiente mr. dr. Ryçond Santos do Nascimento ta considera su decision pa subi lista berde AVP como un di su erornan cu e la comete den su bida. Asina e parlamentario a admiti na e periodista Tito Laclé durante e programa Noticiacla LIVE diamars anochi. E ta splica esaki den un fragment di e programa.
ORANJESTAD - Cuerpo di bombero temporalmente tin ekipo nobo di maneho. Por lo menos asina minister di husticia Rocco Tjon a anuncia diaranson mainta riba su pagina di Facebook. Esaki despues cu a manda esun cu tabata na cabes, Emilio Geerman cas recientemente. “Awe mainta nos a reuni cu e miembronan nobo di e management team di brandweer. Esaki mirando e ultimo desaroyonan” e minister a cuminsa na bisa.
WILLEMSTAD – Recientemente durante un conferencia cu a tuma lugar na Corsou, diferente partner di salud mental (GGZ) den e Caribe Hulandes a logra adelanto den nan esfuerso pa intensifica e acuerdo di colaboracion titula ‘Dutch Caribbean Mental Health’ y a expresa nan deseao di formalisa esaki den un entidad huridico. Meta di ‘Federatie Dutch Caribbean Mental Health’ ta pa promove calidad di cuido di salud mental riba tur e islanan den Reino. E federacion lo facilita intercambionan di experticio di contenido y e parti organisatorio. Principalmente riba e tereno di calidad, desaroyo continuo, ley y regulacion y educacion.
DEN HAAG - E siman aki cu Minister Maduro di Finansa ta na Hulanda, e mandatario a reuni cu Presidente di CAFT, sra. Lidewijde van Olerongen. Minister Maduro a duna un update riba e trabounan pa mehora maneho financiero di Aruba y a repasa e proceso pa yega na un miembro nobo pa Aruba den CAFT ya cu e termino di sra. Helen van der Wal ta bay yega su fin na augustus e aña aki. E mandatario a combersa tambe riba e reglanan presupuestario y e maneho cu ta wordo traha pa trata cu surplus, ya cu pa basta aña Aruba a conoce solamente presupuesto cu deficit y awo Aruba ta trahando cu presupuesto cu surplus.
ORANJESTAD – Desde awor en adelante, gobiero ta duna permiso solamente pa traha boutique hotel, vs cualkier otro tipo di hotel. Minister Dangui Oduber diamars a anuncia cu a introduci e maneho nobo di otorgamento pa permiso di hotel den cuadro di turismo sostenibel. “E maneho aki ta tene na cuenta cu Aruba no por sigui crece na e velocidad cu e ta bayendo y mester tuma accionan concreto pa frena e cantidad di cambernan cu ainda lo mester construe”.
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.