Knops: No ta kere cu ayudo (pa e.o. loonsubsidie) lo termina pronto

DEN HAAG/ORANJESTAD – Hulanda no ta kere cu e ayudo financiero actual (manera p.e. loonsubsidie) lo termina pronto. Asina secretario di estado Hulandes Raymond Knops a contesta e pregunta di noticiacla diabierna mainta, ki tempo tin pensa di cuminsa para e ayudo aki (awor cu tin un acuerdo firma). E mandatario a bisa si tambe cu e decision specifico pa termina loonsubsidie ta un decision cu Aruba tin cu tuma. Pues  ta gabinete di Aruba ta dicidi. Esey ta mishi cu autonomia y mi no ta bay determina esaki” Knops a sigui bisa. Mester nota cu ta di e placa cu Hulanda a manda, gobierno a logra paga e.o. e loonsubsidie. Knops a compronde e formulacion di e pregunta si, y despues a sigui riba dje. 

AYUDO TA CONTINUA

Mientras cu Knops no a ‘contesta’ e pregunta specificamente, el a bisa si cu tanten cu Aruba cumpli cu su obligacionnan, Hulanda lo sigui sostene Aruba den forma di fianza. Cu esaki Knops kier men cu for di e fianzanan aki, Aruba por duna e asina yama loonsubsidie e ora. Claro cu nos ta bay wak si e ayudo financiero (cu Hulanda ta manda pa Aruba) ta bay pa sostene entradanan, si nan ta na nivel? Nos lo tene combersacion riba esey. Pero nos ta compronde tambe cu den un situacion asina cu e pais ta asina dependiente di turismo cu ta practicamente paraliza awor, cu bo no por spera cu e (ayudo financiero) ta termina lihe” Knops a bisa. E pregunta ta den cuadro di e preocupacion di gremio comercial cu ta boga pa e ayudo aki continua den 2021 y no termina na fin di e aña aki, manera tin e percepcion.