Por compronde di Knops cu tanten no ‘overhaul’ e sistema di salario, ‘cortamento di salario’ ta sigui ‘tot nader order’

DEN HAAG/ORANJESTAD – E mensahe tabata hopi cla for di Hulanda awe diabierna: Mientras cu e no a duna un fecha of indicacion concreto di ki dia lo ‘para’ e exigencia impone di reduccion di salario di ambtenaar na Aruba cu entre 5 pa 12% (incluyendo minister y parlamentario), secretario di estado Raymond Knops a bisa diabierna mainta durante su conferencia di prensa, cu cosnan no por keda manera nan ta y cu mester haci un evaluacion y cambio den e sistema salarial prome. Asina e mandatario Hulandes a reacciona riba un pregunta di prensa, di ki tempo e ‘tot nader order’ riba e acto aki ta ‘cancela’. 

OVERHAUL DI SISTEMA 

Por compronde di e contesta di e mandatario Hulandes, segun su palabranan pues, cu tanten cu no tin un ‘overhaul’ (un cambio completo) den e sistema di salario den forma structural pa crea un situacion duradero, e situacion actual, ta keda manera cu e ta awor, esta ‘tot nader order’. E gastonan di sector publico na Aruba (principalmente salario di ambtenaar), ta halto den perspectiva Caribense. E 'overhaul' lo mester percura cu e "public wage bill", osea e recibo salarial publico ta bin den liña cu esun Caribense, cu ta un promedio di 10% di e PIB (Producto Interno Bruto).Y segun drs Knops, e sindicatonan (cu ta esnan cu kier un claridad riba esaki), tambe mester asumi nan responsabilidad. For di premier Evelyn Wever Croes, a compronde cu e evaluacion aki lo sosode den prome cuartal di 2021, unda cu lo tin cu determina si ta ‘continua’ cu e reduccion aki of ta sigui cu esaki ‘tot nader order’.