Cantidad record di caso positivo di COVID19 na Corsou no ta di turismo

WILLEMSTAD – E cantidad record di casonan positivo di COVID19 na Corsou diaranzon, no ta debi na turismo. Asina e epidimiologo Izzy Gerstenbluth a bisa diahuebs mainta na Corsou durante un conferencia di prensa. “Tin un discusion andando di turistanan cu lo a trece e virus Corsou. Esey no ta e caso. E transmision di e virus ta sosodiendo den comunidad local mes, pues no entre turistanan” Gerstenbluth a sigui bisa. E casonan importa ta zero of ya ta den cuarentena segun e experto medico. 

CANTIDAD RECORD

Manera cu e portal aki a raporta caba diaranzon, Corsou a conoce e cantidad di mas grandi di casonan positivo pa un dia cu ta 51. Mayoria ta trata di casonan cu ta relaciona cu un caso di contagio caba.