Vroegop: Falta pa tuma decision na tempo y comunicacion tabata un di e problemanan na HOH

ORANJESTAD – E falta pa tuma decision na tempo y fayo den comunicacion ta(bata) un di e problemanan na Horacio Oduber Hospital. Asina e director medico nobo drs Jacco Vroegop ta bisa noticiacla diaranzon mainta durante un conferencia di prensa. Ademas, e forza di bay pa un reto, ta e motibo cu drs Vroegop a solicita pa bira director medico di hospital Horacio Oduber. Segun drs Vroegop, durante su carera recien e tabata envolvi den varios proyecto cu retonan halto unda cu tabatin crisis. “Mi gusta reto y pa mehora situacionnan y pa cambia esaki” Vroegop a sigui bisa. “Y e reto ey mi a mira aki tambe na Aruba. Un di e motivacionan tabata cu tin un cas hopi bon (edificio di hospital: red), pero cu un par di asunto no ta bayendo bon pasobra nos no ta trahando bon hunto y no ta comunica bon. Y pasobra porta no semper ta tuma decision riba momentonan corecto” sr Vroegop a bisa. E ta kere cu e por hinca su energia aden y trece cambio cu finalmente por mehora e hospital. “Esey ta e meta cu mi tin, y cu e energia cu mi ta uza. Enberdad tin hopi reto, tin hopi problema, pero mi no ta core bay pa nan y no tin miedo y mi ta tribi di tuma responsabilidad pa nan. Pero ta hopi importante pa nos tin un bon ekipo pa esey” sr Vroegop a bisa. Y e ta referi na e escogencia di hunta di supervision pa apunta tambe Gregory Croeze como director di operacion y financiero, y despues e mes. “Hunto nos tey forma un bon management team. Nos ta bay laga e trahadornan carga esaki y percura pa e wiel cuminsa bira esaki” e director nobo a bisa.  Ora cu a puntre, kico ta pone e pensa cu e si por logra loke porta otronan no a logra e director a contesta bisando cu e hecho cu e ta hoben (y segun nan a bise, dinamico), ta un factor importante cu ta dune un energia diferente. Den pasado tabatin hende cu edad mas halto, y cu ideanan diferente, pero e ta kere cu e hecho cu e ta mas hoben, ta sigur un beneficio.