Presidente di KvK: Aña 2015 lo sigui cu reto continuo y oportunidad nobo

ORANJESTAD – No obstante e reto y insiguridadnan den finanzas publico observa den 2014, economia local a sa di crece den cierto areanan. Na palabra tabata e presidente nobo di Camara di Comercio, Daphne Lejuez awe nochi durante su discurso na occasion di e recepcion di aña nobo di e gremio comercial. E di tres dama cu ta presidi e gremio aki, a mustra cu e crecemento menciona ta debi primeramente danki na e iniciativa y creatividad di sector priva. “Aña 2015 no ta mustra diferente, cu su retonan continuo y tambe e oportunidadnan nobo. Segun Lejuez, un di e obhetivonan principal di Camara di Comercio, semper tabata pa proteha e interes di e comunidad comercial di Aruba y e isla en general.

Mientras cu algun politica impopular pero necesario ta rekeri corahe di e politiconan, combina cu liderazgo fuerte, combina cu un interes genuino den e bienestar di e ciudadano a largo plazo, Camara di Comercio ta sigur cu pa medio di dialogo continuo, por logra resultado cu ta encurasha stabilidad y prosperidad pa e economia local. Lesa e discurso original aki.